സൗകര്യങ്ങളില്ലാത്തതിനാല്‍ കമ്മിഷന്‍ മടങ്ങി

തിരുവനന്തപുരം: കല്ലുവാതുക്കല്‍ മദ്യദുരന്തത്തെ കുറിച്ച് അന്വേഷിക്കുന്ന ജസ്റിസ് മോഹന്‍കുമാര്‍ കമ്മിഷന്‍ സിറ്റിംഗ് നടത്താതെ മടങ്ങി.

ജൂണ്‍ 23 ശനിയാഴ്ച രാവിലെ തൈക്കാട് ഗസ്റ് ഹൗസിലായിരുന്നു സിറ്റിംഗ് വെച്ചിരുന്നത്. എന്നാല്‍ മുന്‍കൂട്ടി സര്‍ക്കാരിനെ അറിയിച്ചിട്ടും താമസസൗകര്യങ്ങളുള്‍പ്പെടെയുള്ള സൗകര്യങ്ങള്‍ നല്‍കാത്ത കാരണത്താല്‍ സിറ്റിംഗ് ജൂലായ് ഏഴിലേക്ക് മാറ്റുകയാണെന്ന് കമ്മിഷന്‍ വൃത്തങ്ങള്‍ അറിയിച്ചു.

സൗകര്യങ്ങള്‍ ലഭ്യമല്ലാത്തതിനാല്‍ കമ്മിഷന്‍ ജസ്റിസ് മോഹന്‍കുമാര്‍ എത്തിയിരുന്നില്ല. മറ്റ് ഉദ്യോഗസ്ഥരാണ് സിറ്റിംഗ് മാറ്റിലെച്ച കാര്യം അറിയിച്ചത്. സിറ്റിംഗ് ഉണ്ടെന്ന പ്രതീക്ഷയില്‍ തെളിവ് നല്കാനായി നിരവധി പേരുമെത്തിയിരുന്നു. സര്‍ക്കാരിന്റെ അഭിഭാഷകന്‍ അഡ്വ.പ്രസന്നകുമാറും ഹാജരായിരുന്നു.

കഴിഞ്ഞ സിറ്റിംഗും ഇതേ കാരണത്താല്‍ മാറ്റിവെച്ചിരുന്നു. എല്‍ഡിഎഫ് ഭരണകാലത്ത് അന്ന് പ്രതിപക്ഷത്തായിരുന്നില്ല യുഡിഎഫില്‍ പെട്ടയാരും തന്നെ തെളിവ് നല്‍കാന്‍ എത്തിയിരുന്നില്ല. ജൂലായ് ഏഴിന് നടക്കുക കമ്മിഷന്റെ അവസാനത്തെ സിറ്റിംഗായിരിക്കും.