തീവണ്ടിയപകടം: റിപ്പോര്‍ട്ട് ഒരാഴ്ചയ്ക്കുള്ളില്‍

ചെന്നൈ: കടലുണ്ടി തീവണ്ടിയപകടത്തെ പറ്റി അന്വേഷണം നടത്തുന്ന റെയില്‍വെ ചീഫ് കമ്മിഷണര്‍ ഒരാഴ്ചയ്ക്കുള്ളില്‍ റിപ്പോര്‍ട്ട് സമര്‍പ്പിക്കുമെന്ന് കേന്ദ്ര റെയില്‍വെ മന്ത്രി നിതീഷ്കുമാര്‍ പറഞ്ഞു.

സംഭവത്തെ കുറിച്ച് സ്വതന്ത്ര ഏജന്‍സിയെ കൊണ്ട് അന്വേഷിപ്പിക്കണമെന്ന പ്രതിപക്ഷത്തിന്റെ ആവശ്യം ശ്രദ്ധയില്‍ പെടുത്തിയപ്പോള്‍ ഇപ്പോള്‍ നടക്കുന്നത് സ്വതന്ത്ര അന്വേഷണമാണെന്നായിരുന്നു മന്ത്രിയുടെ മറുപടി. അന്വേഷണം നിഷ്പക്ഷമായിരിക്കുമെന്ന് അദ്ദേഹം പറഞ്ഞു.

അപകടം നടക്കുന്നതിന് രണ്ടു ദിവസം മുമ്പും റെയില്‍വേ ഉദ്യോഗസ്ഥര്‍ കടലുണ്ടി പാലം പരിശോധിച്ചിരുന്നു. പാലം സുരക്ഷിതമാണെന്നായിരുന്നു ഉദ്യോഗസ്ഥരുടെ റിപ്പോര്‍ട്ടില്‍ വ്യക്കമാക്കിയിരുന്നത്. പാലത്തിന്റെ ഒരു തൂണ് പുഴയില്‍ താണുപോയതെന്തുകൊണ്ടെന്ന് അന്വേഷണത്തില്‍ പരിശോധിക്കും.

ഉദ്യോഗസ്ഥര്‍ കുറ്റക്കാരെന്ന് കണ്ടെത്തുകയാണെങ്കില്‍ കര്‍ശന നടപടി സ്വീകരിക്കുമെന്ന് നിതീഷ്കുമാര്‍ പറഞ്ഞു.