പി.സി. തോമസ് കോട്ടയത്ത്, മാണി ഗ്രൂപ്പ് പിളര്‍പ്പിലേക്ക്

കൊച്ചി: ദില്ലിയില്‍ വച്ച് ദേശീയ കര്‍ഷക മുന്നണി രൂപീകരിച്ച പി.സി. തോമസ് എംപി കോട്ടയത്തെത്തിയതോടെ കേരള കോണ്‍ഗ്രസ് (എം) പിളര്‍പ്പിലേക്ക് നീങ്ങുന്നു. കര്‍ഷക മുന്നണിയുടെ സംസ്ഥാന ഘടകം രൂപീകരിക്കാനായാണ് തോമസ് ജൂണ്‍ 25 തിങ്കളാഴ്ച കൊച്ചിയിലെത്തിയത്.

തന്നെ പാര്‍ട്ടി പുറത്താക്കുകയാണെങ്കിലും കര്‍ഷക മുന്നണി പ്രവര്‍ത്തനവുമായി മുന്നോട്ടു പോകാനാണ് തോമസിന്റെ തീരുമാനം. മന്ത്രിസ്ഥാനം തന്റെ ജിവിതാഭിലാഷമല്ലെന്ന് വ്യക്തമാക്കിയ തോമസ് തനിക്കെതിരെ പാര്‍ട്ടിയില്‍ ചില കുതന്ത്രങ്ങള്‍ അരങ്ങേറുന്നുണ്ടെന്ന് പരാതിപ്പെട്ടു. തനിക്കെതിരെയുള്ള നീക്കങ്ങള്‍ ശക്തമായതോടെയാണ് മുന്നണി രൂപീകരണവുമായി മുന്നോട്ടു പോകാന്‍ തീരുമാനിച്ചതെന്ന് അദ്ദേഹം പറഞ്ഞു.

പാര്‍ട്ടിയില്‍ തനിക്കെതിരായ പ്രവര്‍ത്തനം രൂക്ഷമായിട്ടുണ്ടെങ്കിലും എംപി സ്ഥാനം രാജിവക്കാന്‍ തോമസ് ഇതുവരെ തീരുമാനിച്ചിട്ടില്ല. കഴിഞ്ഞ നിയമസഭാ തിരഞ്ഞെടുപ്പോടു കൂടിയാണ് പാര്‍ട്ടി നേതാവ് കെ.എം. മാണിയുമായി താന്‍ അകലാന്‍ തുടങ്ങിയതെന്ന് തോമസ് വ്യക്തമാക്കി.

തിരഞ്ഞെടുപ്പില്‍ മാണിയുടെ മകന്‍ ജോസ് കെ. മാണിയെ സ്ഥാനാര്‍ത്ഥിയാക്കാന്‍ നീക്കമുണ്ടായിരുന്നെങ്കിലും അത്് വിജയിച്ചില്ല. അതിന് കാരണക്കാരനൊന്നുമായിരുന്നില്ലെങ്കിലും താന്‍ ഇക്കാര്യത്തില്‍ തെറ്റിദ്ധരിക്കപ്പെട്ടുവെന്ന് തോമസ് പറഞ്ഞു.

പാര്‍ട്ടി നേതാവ് കെ.എം. മാണിക്ക് വിവിധ സ്ഥലങ്ങളില്‍ ഗംഭീര സ്വീകരണം നല്‍കി തോമസിന്റെ നീക്കങ്ങളുടെ മുനയൊടിക്കാനാണ് ഔദ്യോഗിക പക്ഷം തീരുമാനിച്ചിരിക്കുന്നത്. ഇതിന്റെ ഭാഗമായി തിങ്കളാഴ്ച വൈകുന്നേരം മാണിക്ക് എറണകുളത്ത് സ്വീകരണ യോഗം ഒരുക്കുന്നുണ്ട്.