യു ഡി എഫ് യോഗങ്ങളില് പങ്കെടുക്കുമെന്ന് ഗണേഷ്കുമാര്
തിരുവനന്തപുരം: യു ഡി എഫ് യോഗങ്ങളില് താന് തുടര്ന്നും പങ്കെടുക്കുമെന്ന് ട്രാന്സ്പോര്ട്ട് വകുപ്പ് മന്ത്രി കെ ബി ഗണേഷ്കുമാര് വ്യക്തമാക്കി. യു ഡി എഫ് യോഗങ്ങളില് കേരള കോണ്ഗ്രസ് (ബി)യിലെ മന്ത്രി പങ്കെടുക്കരുതെന്ന് പാര്ട്ടി തീരുമാനിച്ചിട്ടില്ലെന്ന് ഗണഷ്കുമാര് പറഞ്ഞു.
യു ഡി എഫ് യോഗങ്ങളില് മന്ത്രി ഉള്പ്പെടെ ആരും കേരളകോണ്ഗ്രസില് നിന്നും പങ്കെടുക്കേണ്ടെന്ന് പാര്ട്ടി തീരുമാനിച്ചതായുള്ള കേരള കോണ്ഗ്രസ്(ബി) ചെയര്മാന് ആര് ബാലകൃഷ്ണപിള്ള എം എല് എ യുടെ നിലപാടിന് വിരുദ്ധമാണ് പിള്ളയുടെ മകനും മന്ത്രിയുമായ ഗണേഷ്കുമാറിന്റെ തീരുമാനം.
യു ഡി എഫ് യോഗങ്ങളില് പങ്കെടുക്കരുതെന്ന് തന്നോടാരും പറഞ്ഞിട്ടില്ലെന്നും പറയാത്ത സ്ഥിതിയ്ക്ക് തുടര്ന്നും പങ്കെടുക്കുമെന്നുമാണ് ഗണേഷ്കുമാറിന്റെ നിലപാട്. കഴിഞ്ഞ യു ഡി എഫ് യോഗത്തില് പങ്കെടുക്കാന് കഴിയാതിരുന്നത് മൂവാറ്റുപുഴയില് കേരളകോണ്ഗ്രസ് സ്ഥാപകനേതാവ് കെ എം ജോര്ജിന്റെ ശവകുടീരത്തില് പുഷ്പാര്ച്ചന നടത്താന് പോയിരുന്നതുകൊണ്ടാണെന്നും മന്ത്രി വ്യക്തമാക്കി.
യു ഡി എഫ് യോഗങ്ങളില് നിന്നും മന്ത്രിമാര്ക്ക് ഒഴിഞ്ഞുനില്ക്കാനാവില്ല. പല സുപ്രധാന കാര്യങ്ങളും ചര്ച്ച ചെയ്യുകയും തീരുമാനമെടുക്കുകയും ചെയ്യുന്ന വേദിയാണ് യു ഡി എഫ് യോഗം- ഗണേഷ്കുമാര് ചൂണ്ടിക്കാട്ടി.