പരിയാരം കോളജ്: ഉപസമിതിയെ നിയോഗിച്ചു

തിരുവനന്തപുരം: പരിയാരം മെഡിക്കല്‍ കോളജ് സഹകരണ മേഖലയിലേക്ക് കൈമാറുന്നതു സംബന്ധിച്ച നിയമവശങ്ങള്‍ പഠിക്കാനായി അഞ്ചംഗ മന്ത്രിസഭാ ഉപസമിതിയെ നിയോഗിച്ചു.

നിയമമന്ത്രി കെ.എം.മാണി, സഹകരണമന്ത്രി എം.വി.രാഘവന്‍, ആരോഗ്യമന്ത്രി പി.ശങ്കരന്‍, ധനകാര്യമന്ത്രി കെ.ശങ്കരനാരായണന്‍, വനംമന്ത്രി കെ.സുധാകരന്‍ എന്നിവരാണ് സമിതിയിലെ അംഗങ്ങള്‍. ജൂണ്‍ 27 ബുധനാഴ്ച ചേര്‍ന്ന മന്ത്രിസഭായോഗത്തിനു ശേഷം മുഖ്യമന്ത്രി എ.കെ.ആന്റണിയാണ് ഇക്കാര്യം അറിയിച്ചത്.

സമിതിയോട് എത്രയും പെട്ടെന്ന് റിപ്പോര്‍ട്ട് സമര്‍പ്പിക്കാന്‍ മന്ത്രിസഭ ആവശ്യപ്പെട്ടിട്ടുണ്ട്. മെഡിക്കല്‍ കോളജ് സഹകരണമേഖലയ്ക്ക് കൈമാറാന്‍ നേരത്ത യുഡിഎഫ് ഉന്നതാധികാര സമിതി സര്‍ക്കാരിനോട് ശുപാര്‍ശ ചെയ്തിരുന്നു.

ആള്‍ ഇന്ത്യാ മെഡിക്കല്‍ കൗണ്‍സിലിന്റെ അംഗീകാരം ലഭിക്കുന്നതിന് ആറ് ഉപാധികള്‍ നടപ്പിലാക്കേണ്ടതുണ്ട്. പൊതുമേഖലയില്‍ തന്നെ കോളജ് തുടരുകയാണെങ്കില്‍ കോളജിന്റെ പരിഷ്കരണ നടപടികള്‍ക്കായി 13 കോടി രൂപ ഈ മാസം തന്നെ കണ്ടെത്തേണ്ടതുണ്ട്. സഹകരണ മേഖലയ്ക്ക് കൈമാറുകയാണെങ്കില്‍ ഇത്രയും രൂപ സമാഹരിക്കാന്‍ ബുദ്ധിമുട്ടുണ്ടാവില്ലെന്നതിനാലാണ് സഹകരണമേഖലയ്ക്ക് കൈമാറാന്‍ തീരുമാനമെടുത്തത്.