സാമ്പത്തിക ബാധ്യതയുള്ള പദ്ധതികള്‍ ഏറ്റെടുക്കില്ല

തിരുവനന്തപുരം: കേരളം നേരിടുന്ന കടുത്ത സാമ്പത്തിക പ്രതിസന്ധി കാരണം കൂടുതല്‍ സാമ്പത്തിക ബാധ്യതയുള്ള പരിപാടികള്‍ ഏറ്റെടുത്തു നടത്തുകയില്ലെന്ന് മുഖ്യമന്ത്രി എ.കെ. ആന്റണി. ജൂണ്‍ 28 വ്യാഴാഴ്ച സെക്രട്ടേറിയറ്റിലെ ധര്‍ബാര്‍ ഹാളില്‍ നടന്ന ചെറുകിട-സായാഹ്ന പത്രങ്ങളുടെ എഡിറ്റര്‍മാരുടെ യോഗത്തില്‍ അധ്യക്ഷത വഹിച്ച് സംസാരിക്കുകയായിരുന്നു മുഖ്യമന്ത്രി.

പുതിയ സര്‍ക്കാര്‍ വന്നാല്‍ ഒട്ടേറെ ജനപ്രിയ പദ്ധതികള്‍ ജനങ്ങള്‍ പ്രതീക്ഷിക്കും. ഒട്ടേറെ പദ്ധതികള്‍ നടപ്പാക്കാന്‍ ഞങ്ങള്‍ക്ക് ആഗ്രഹവുമുണ്ട്. എന്നാല്‍ അത് നല്‍കാന്‍ കഴിയാത്ത നിര്‍ഭാഗ്യവാന്മാരാണ് ഞങ്ങള്‍. ഇതിനു മുമ്പ് ഒരു സര്‍ക്കാരിനും ഇത്തരമൊരു വിഷമസ്ഥിതി നേരിടേണ്ടിവന്നിട്ടില്ല - മുഖ്യമന്ത്രി വ്യക്തമാക്കി.

പ്രതിസന്ധി കാരണം സാമ്പത്തിക ബാധ്യതയുള്ള കാര്യങ്ങള്‍ പത്രങ്ങള്‍ക്കു വേണ്ടിയും ചെയ്യാന്‍ കഴിയില്ലെന്ന് മുഖ്യമന്ത്രി പറഞ്ഞു. 2000 മാര്‍ച്ച് 31 വരെയുള്ള പരസ്യതുകയുടെ കുടിശികയെങ്കിലും അടച്ചു തീര്‍ക്കണമെന്ന് എഡിറ്റര്‍മാര്‍ ആവശ്യപ്പെട്ടപ്പോള്‍ കുറച്ചു മാസത്തെ സാവകാശം കൂടി തരണമെന്നായി മുഖ്യമന്ത്രി.

ചെറുകിട പത്രപ്രവര്‍ത്തകര്‍ക്ക് പത്രപ്രവര്‍ത്തക പെന്‍ഷന്‍ പദ്ധതിയില്‍ അംഗമാകാനുള്ള തടസ്സം നീക്കണമെന്നും യോഗം മുഖ്യമന്ത്രിയോട് അഭ്യര്‍ത്ഥിച്ചു. ആവശ്യങ്ങള്‍ അനുഭാവത്തോടെ പരിഗണിക്കാമെന്ന് ആന്റണി ഉറപ്പു നല്‍കി.

സംസ്ഥാന സര്‍ക്കാരിന്റെ പൊതുജനസമ്പര്‍ക്ക പരിപാടികള്‍ കൂടുതല്‍ മികച്ചതാക്കുമെന്ന് യോഗത്തില്‍ പങ്കെടുത്ത പാര്‍ലമെന്ററി കാര്യമന്ത്രി എം.എം. ഹസന്‍ പറഞ്ഞു.