മില്‍മ യൂണിറ്റ് കൈമാറ്റം: പരക്കെ സ്വാഗതം

കൊച്ചി: മില്‍മയുടെ എറണാകുളം യൂണിറ്റ് ദേശീയ ക്ഷീരവികസന ബോര്‍ഡ് (എന്‍ഡിഡിബി) ഏറ്റെടുത്തതിന് പരക്കെ സ്വാഗതം.

ഭരണപക്ഷത്തെയും പ്രതിപക്ഷത്തെയും അനുകൂലിക്കുന്ന തൊഴിലാളി സംഘടനകള്‍ ഈ തീരുമാനത്തെ പൊതുവെ സ്വാഗതം ചെയ്തിരിക്കുകയാണ്. കര്‍ഷകര്‍ക്ക് പിരിഞ്ഞു കിട്ടാനുള്ള കുടിശ്ശിക തുക ഉടന്‍ തന്നെ കിട്ടുന്നത് നല്ല കാര്യമാണെന്ന് സിഐടിയു, ഐഎന്‍ടിയുസി തുടങ്ങിയ സംഘടനകളുടെ ഭാരവാഹികള്‍ പറഞ്ഞു.

15 കോടി രൂപ നഷ്ടത്തില്‍ പ്രവര്‍ത്തിക്കുന്ന ഈ യൂണിറ്റ് ഒട്ടേറെ പ്രശ്നങ്ങളിലൂടെയാണ് കടന്നുപോകുന്നത്. പുതിയ പ്ലാന്റുകള്‍ സ്ഥാപിച്ച് യൂണിറ്റിന്റെ സംഭരണ ശേഷി വര്‍ദ്ധിപ്പിക്കുകയും അതിലൂടെ ലാഭത്തിലേക്ക് നയിക്കാനുമാണ് ബോര്‍ഡ് ഏറ്റെടുത്തിരിക്കുന്നത്.

അതേസമയം മില്‍മ യൂണിറ്റ് നേരിടുന്ന പ്രതിസന്ധിക്ക് അടിയന്തിരമായ പരിഹാരം കാണണമെന്നാവശ്യപ്പെട്ട് കേരള കര്‍ഷകസംഘത്തിന്റെ നേതൃത്വത്തില്‍ ജൂണ്‍ 28 വ്യാഴാഴ്ച മില്‍മയുടെ മുന്നില്‍ ധര്‍ണ നടത്തി. കര്‍ഷകസംഘം നേതാവ് ഗോപി കോട്ടമുറിക്കല്‍ ഉദ്ഘാടനം ചെയ്തു. എറണാകുളം, ആലപ്പുഴ ഉള്‍പ്പെടെ നാലു ജില്ലകളിലെ ക്ഷീരകര്‍ഷകരാണ് ധര്‍ണയില്‍ പങ്കെടുത്തത്.