സാംപ്രാസ്, സഫിന് മൂന്നാം റൗണ്ടില്
ലണ്ടന്: ഒന്നാം സീഡും ഇപ്പോഴത്തെ ചാമ്പ്യനുമായ അമേരിക്കയുടെ പീറ്റ് സാംപ്രാസ് വിംബിള്ഡണ് ടെന്നീസിന്റെ പുരുഷവിഭാഗത്തില് മൂന്നാം റൗണ്ടില് കടന്നു. ജൂണ് 27 ബുധനാഴ്ച വൈകീട്ട് നടന്ന മത്സരത്തില് ഇംഗ്ലണ്ടിന്റെ ബാരി കൊവാനെ അഞ്ചു സെറ്റ് നീണ്ട പോരാട്ടത്തില് കീഴടക്കിയാണ് സാംപ്രാസ് മുന്നേറിയത്. സ്കോര്: 6-3, 6-2, 6-7, 4-6, 6-3.
നാട്ടുകാരുടെ പൂര്ണപിന്തുണയോടെ കളിച്ച കൊവാനെതിരെ സാംപ്രാസിന് ശരിക്കും വിയര്ക്കേണ്ടിവന്നു. ആദ്യ രണ്ടുസെറ്റുകള് പെട്ടെന്നു തന്നെ കരസ്ഥമാക്കാനായെങ്കിലും മൂന്നും നാലും സെറ്റുകളില് കൊവാന് അവിശ്വസനീയമായി തിരിച്ചുവന്നു. എന്നാല് നിര്ണായകമായ അഞ്ചാംസെറ്റില് അനുഭവസമ്പത്ത് സാംപ്രാസിന്റെ രക്ഷക്കെത്തുകയായിരുന്നു.
നാലാം സീഡ് റഷ്യയുടെ മാരത് സഫിനും ആറാം സീഡ് ബ്രിട്ടന്റെ ടിം ഹെന്മാനും മൂന്നാം റൗണ്ടില് കടന്നു. സഫിന് കാനഡയുടെ ഡാനിയല് നെസ്റര്ക്കെതിരെ 7-6, 3-6, 1-2 എന്ന നിലയില് നില്ക്കുമ്പോള് എതിരാളി പിന്മാറുകയായിരുന്നു. നാട്ടുകാരനായ മാര്ട്ടിന് ലീയെ 6-2, 6-3, 6-4 എന്ന സ്കോറിന് തോല്പിച്ചാണ് ഹെന്മാന് മുന്നേറിയത്.
15ാം സീഡ് റോജെര് ഫെഡറര്, 23ാം സീഡ് ടോഡ് മാര്ട്ടിന്, 26ാം സീഡ് ഷ്യെന് സാല്ക്കന്, ഗൊരാന് ഇവാനിസെവിച്ച് എന്നിവരും മൂന്നാം റൗണ്ടിലെത്തിയിട്ടുണ്ട്.