ജയലളിത ശനിയാഴ്ച ഗുരുവായൂരില്‍

ഗുരുവായൂര്‍: ഗുരുവായൂര്‍ ക്ഷേത്രത്തില്‍ ആനയെ നടക്കിരുത്താനായി തമിഴ്നാട് മുഖ്യമന്ത്രി ജയലളിത ജൂണ്‍ 30 ശനിയാഴ്ച ക്ഷേത്രത്തിലെത്തും.

15 വയസായ കണ്ണന്‍ എന്ന ആനയെയാണ് ജയലളിത ക്ഷേത്രത്തില്‍ നടയ്ക്കിരുത്തുന്നത്. രാവിലെ ഏഴ് മണിയോടെ ജയലളിത ക്ഷേത്രത്തിലെത്തുമെന്നാണ് പ്രതീക്ഷിക്കുന്നതെന്ന് ദേവസ്വം അഡ്മിനിസ്ട്രേറ്റര്‍ കെ.എന്‍.സതീഷ് പറഞ്ഞു.

ശനിയാഴ്ച ശ്രീകോവിലില്‍ നെയ്വിളക്കുകള്‍ തെളിയിക്കാന്‍ ജയലളിത വഴിപാട് നേര്‍ന്നിട്ടുണ്ട്. 12 കിലോഗ്രാം നെയ് ആണ് ഇതിനായി ഉപയോഗിക്കുന്നത്. ഗുരുവായൂരന്റെ വിഗ്രഹത്തില്‍ കളഭച്ചാര്‍ത്തും നടത്തും. ആറ് ഉരുള കളഭം ഇതിനായി ഉപയോഗിക്കും. വിഘ്നേശ്വരന്റെയും ശാസ്താവിന്റെയും ഭഗവതിയുടെയും വിഗ്രഹങ്ങളില്‍ ഓരോ ഉരുള കൊണ്ട് കളഭച്ചാര്‍ത്ത് നടത്തും.

ക്ഷേത്രത്തിലെ 51 ആനകള്‍ക്ക് ആനയൂട്ടും നടത്തും. കണ്ണനടക്കം 52 ആനകളാണ് ഇനി ക്ഷേത്രത്തിന്റേതായുണ്ടാവുക.

ജയലളിതയുടെ ക്ഷേത്രസന്ദര്‍ശനത്തോടനുബന്ധിച്ച് ക്ഷേത്രപരിസരത്തില്‍ സുരക്ഷ ശക്തമാക്കിയിട്ടുണ്ട്. ഡിഐജി മുകേഷ് കുമാര്‍ സിഹ്നയും തൃശൂര്‍ ജില്ലാ സൂപ്രണ്ട് ബി.കെ.ഉപാധ്യായയും സുരക്ഷാ സംവിധാനം പരിശോധിക്കാന്‍ ക്ഷേത്രത്തിലെത്തിയിരുന്നു.

ശനിയാഴ്ച ഭക്തര്‍ക്ക് ക്ഷേത്രസന്ദര്‍ശനം നടത്തുന്നതിന് എന്തെങ്കിലും നിയന്ത്രണങ്ങള്‍ ഏര്‍പ്പെടുത്തുമോയെന്നതിനെ കുറിച്ച് പിന്നീട് അറിയിക്കുമെന്ന് അഡ്മിനിസ്ട്രേറ്റര്‍ അറിയിച്ചു.