യുഡിഎഫ് വിടില്ല: ബാലകൃഷ്ണപിള്ള
തിരുവനന്തപുരം: സമീപഭാവിയിലോ വിദൂരഭാവിയിലോ കേരളാ കോണ്ഗ്രസ് ബി യുഡിഎഫ് വിടുന്ന കാര്യം ആലോചിച്ചിട്ടു പോലുമില്ലെന്ന് പാര്ട്ടി ചെയര്മാന് ആര്. ബാലകൃഷ്ണപിള്ള.
യുഡിഎഫില് തന്നെ കേരളാ കോണ്ഗ്രസ് ബി ഉറച്ചു നില്ക്കുമെന്ന് ജൂണ് 29 വെള്ളിയാഴ്ച പാര്ട്ടിയുടെ സംസ്ഥാന സമിതി യോഗത്തില് സംസാരിക്കവെ പിള്ള വെളിപ്പെടുത്തി. കേരളാ കോണ്ഗ്രസ് ബിയിലെ ആഭ്യന്തര പ്രശ്നങ്ങളില് യുഡിഎഫിലെ മറ്റ് ഘടകക്ഷികള് ഇടപെടേണ്ട കാര്യമില്ല. അത് ഏത് പ്രമാണിയായാലും അനുവദനീയമല്ലെന്ന് പിള്ള വ്യക്തമാക്കി.
ഗണേശനും താനും തമ്മില് യാതൊരു പ്രശ്നവുമില്ല. സോണിയ ആന്റണിയെ നിയന്ത്രിക്കുന്നതു പോലെ എന്റെ കക്ഷിയുടെ മന്ത്രിയെ നിയന്ത്രിക്കാന് എനിക്ക് അധികാരമുണ്ട്. മന്ത്രി എങ്ങനെ പോകണമെന്നും പ്രവര്ത്തിക്കണമെന്നും പറയാന് എനിക്കറിയാം. വെറുമൊരു തന്ത മാത്രമല്ല ഞാന് കുറെക്കാലം മന്ത്രിക്കസേരയില് ഇരുന്നയാളാണ് -പിള്ള തുറന്നടിച്ചു.
മന്ത്രിസ്ഥാനത്ത് കൊതിതീരുവോളം ഇരുന്നയാളാണ് ഞാന്. എനിക്ക് അതില് ആശയില്ല. എന്നാല് വേണമെങ്കില് ഇനിയുമാവാനും കഴിയും.- പിള്ള പറഞ്ഞു. സര്ക്കാരിനെ നേര്വഴിയിലൂടെ നയിക്കാന് വേണ്ട നിര്ദേശങ്ങള് നല്കാന് യുഡിഎഫ് ഘടകകക്ഷികള് ബാധ്യസ്ഥരാണ്. കേരളാ കോണ്ഗ്രസ് ബി യുഡിഎഫിന് നിര്ദേശങ്ങള് നല്കാന് എപ്പോഴുമുണ്ടാകും.
യുഡിഎഫ് യോഗങ്ങളില് പങ്കെടുക്കുന്നതിനെ പറ്റി യോഗത്തില് തീരുമാനമൊന്നും ആയില്ല എന്നാണ് അറിയുന്നത്. മന്ത്രി ഗണേശ്കുമാര്, വേണുഗോപാലന് നായര് തുടങ്ങിയവരും യോഗത്തില് സംബന്ധിച്ചു.