ജൂലായ് 2ന് തമിഴ്നാട് ബന്ദ്
ചെന്നൈ: അറസ്റു ചെയ്യപ്പെട്ട തമിഴ്നാട് മുന്മുഖ്യമന്ത്രി എം. കരുണാനിധിയുടെയും അനുയായികളുടെ മോചനം ആവശ്യപ്പെട്ട് ദേശീയ ജനാധിപത്യ സഖ്യം (എന്ഡിഎ) ജൂലായ് രണ്ട് തിങ്കളാഴ്ച തമിഴ്നാട്ടില് ബന്ദാചരിക്കും.
ഡിഎംകെ ആസ്ഥാനത്ത് ചേര്ന്ന യോഗത്തിനു ശേഷം ഡിഎംകെ ജനറല് സെക്രട്ടറി കെ. അന്പഴകന് വാര്ത്താലേഖകരെ അറിയിച്ചതാണ് ഇക്കാര്യം. എഐഡിഎംകെ സര്ക്കാരിന്റെ കാടന് ഭരണം കാരണം സംസ്ഥാനത്ത് അടിയന്തിരാവസ്ഥയുടെ പ്രതീതിയാണുള്ളതെന്ന് അന്പഴകന് ആരോപിച്ചു.
സംസ്ഥാനത്ത് രാഷ്ട്രപതി ഭരണം ഏര്പ്പെടുത്തണമെന്നും യോഗം ആവശ്യപ്പെട്ടു. 356ാം വകുപ്പ് ഉപയോഗിക്കുന്നതിന് ഡിഎംകെ എതിരാണെങ്കിലും തമിഴ്നാട്ടില് ഇപ്പോള് രാഷ്ട്രപതിഭരണം ആവശ്യമായിരിക്കുയാണെന്ന് യോഗം അംഗീകരിച്ച പ്രമേയം പറയുന്നു.
സംസ്ഥാനത്തെ പുതിയ സംഭവവികാസങ്ങള് ഉടന് തന്നെ രാഷ്ട്രപതി കെ.ആര്. നാരായണനെയും പ്രധാനമന്ത്രി അടല് ബിഹാരി വാജ്പേയിയെയും അറിയിക്കുമെന്ന് അദ്ദേഹം വ്യക്തമാക്കി.