കേരളത്തില് നിന്ന് തമിഴ്നാട്ടിലേക്കുള്ള ബസുകള് റദ്ദാക്കി
തിരുവനന്തപുരം: തമിഴ്നാട്ടില് കരുണാനിധിയെ അറസ്റ് ചെയ്തതിനെ തുടര്ന്നുണ്ടായിരിക്കുന്ന സംഘര്ഷങ്ങള് കണക്കിലെടുത്ത് തമിഴ്നാട്ടിലേക്കുള്ള ബസ് സര്വീസുകള് കെഎസ്ആര്ടിസി താല്ക്കാലികമായി റദ്ദാക്കി.
ഇനി ഒരറിയിപ്പ് ഉണ്ടാകുന്നതു വരെ തമിഴ്നാട്ടിലേക്ക് സര്വീസുണ്ടാകില്ലെന്ന് ജൂണ് 30 ശനിയാഴ്ച കെഎസ്ആര്ടിസി വൃത്തങ്ങള് അറിയിച്ചു. തിരുവനന്തപുരത്ത് നിന്നും നാഗര്കോവിലിലേക്ക് പോയ കെഎസ്ആര്ടിസി ബസിന് നേരെ മാര്ത്താണ്ഡത്തു വച്ച് കല്ലേറുണ്ടായി. നാഗര്കോവിലില് ബസ് സര്വീസ് അവസാനിപ്പിച്ചിരിക്കുകയാണ്. ബാംഗ്ലൂരില് നിന്നും തിരുവനന്തപുരത്തേക്ക് വരികയായിരുന്ന കെഎസ്ആര്ടിസി ബസിന് നേരെ തമിഴ്നാട്ടിലെ കൃഷ്ണഗിരിയില് വച്ച് കല്ലേറുണ്ടായി.
തിരുവനന്തപുരത്ത് നിന്നും തമിഴ്നാടിന്റെ വിവിധ ഭാഗങ്ങളിലേക്ക് സര്വീസ് നടത്തുന്ന സ്വകാര്യ ബസുകളും സര്വീസ് നിര്ത്തിവച്ചിരിക്കുകയാണ്. തിരുവനന്തപുരത്ത് നിന്നും ഉച്ചയ്ക്ക് തിരിക്കുന്ന ചെന്നൈ മെയില് പതിവിലുമധികം സുരക്ഷാ സന്നാഹങ്ങളോടെയാണ് പുറപ്പെട്ടത്.