തിരുവനന്തപുരത്തും വയനാട്ട ിലും മഴ കുറവ്

തിരുവനന്തപുരം: ഇടവപ്പാതി എന്നറിയപ്പെടുന്ന തെക്കുപടിഞ്ഞാറന്‍ കാലവര്‍ഷം ആരംഭിച്ച ജൂണ്‍ മാസത്തില്‍ തിരുവനന്തപുരം, വയനാട് ജില്ലകളില്‍ ലഭിച്ച മഴ സാധാരണ ലഭിക്കുന്നതിനെക്കാള്‍ വളരെ കുറഞ്ഞുവെന്ന് കണക്കുകള്‍ വ്യക്തമാക്കുന്നു.

സാധാരണഗതിയില്‍ തിരുവനന്തപുരത്ത് ഈ കാലയളവില്‍ 421 മില്ലിമീറ്റര്‍ മഴയാണ് പ്രതീക്ഷിക്കപ്പെടുന്നത്. എന്നാല്‍ ലഭിച്ച മഴ 258 മില്ലിമീറ്ററാണ്. ഇത് കിട്ടേണ്ട മഴയെക്കാളും 39 ശതമാനം കുറവാണെന്ന് ചൂണ്ടിക്കാണിക്കപ്പെടുന്നു. വയനാട്ട ില്‍ 45 ശതമാനമാണ് കുറവുണ്ടായത്.

എന്നാല്‍ സംസ്ഥാനത്തൊട്ടാകെ ജൂണ്‍ മാസത്തില്‍ ലഭിച്ച മഴ സാധാരണ ലഭിക്കുന്നതിനെക്കാളും ഒരു ശതമാനം അധികം ലഭിച്ചതായി തിരുവനന്തപുരം കാലാവസ്ഥാ നിരീക്ഷണ കേന്ദ്രത്തിലെ കണക്കുകള്‍ വ്യക്തമാക്കുന്നു. സംസ്ഥാനത്ത് 71 ശതമാനം ശരാശരി മഴ ജൂണ്‍ മാസത്തില്‍ ലഭിച്ചു.

ജൂണില്‍ ഏറ്റവും കൂടുതല്‍ മഴ പെയ്തത് കാസര്‍ഗോഡ് ജില്ലയിലാണ്. കാസര്‍ഗോഡ് 1247 മില്ലീമീറ്റര്‍ മഴ പെയ്തു. ജൂണ്‍ മാസത്തില്‍ പെയ്ത മഴയുടെ അളവില്‍ ഏറ്റവുമധികം വര്‍ധനവുണ്ടായത് എറണാകുളം ജില്ലയിലാണ് . ജില്ലയില്‍ ലഭിക്കുമെന്ന് പ്രതീക്ഷിച്ചിരുന്നത് 741 മില്ലിമീറ്ററായിരുന്നു. എന്നാല്‍ ഇവിടെ 1,072 മില്ലിമീറ്റര്‍ മഴ ലഭിച്ചു. ഏകദേശം 45 ശതമാനം വര്‍ധനവ്.

മറ്റ് ജില്ലകളില്‍ ലഭിച്ച മഴയുടെ അളവ് മില്ലീമീറ്ററില്‍:

കൊല്ലം - 406 (17 ശതമാനം കുറവ് )
ആലപ്പുഴ - 601 (അഞ്ച് ശതമാനം കുറവ് )
ഇടുക്കി - 863 (31 ശതമാനം കൂടുതല്‍)
കോട്ടയം -688 (ഒരു ശതമാനം കുറവ് )
പത്തനംതിട്ട -577 (ഒരു ശതമാനം കുറവ്)
തൃശൂര്‍ - 811 (ആറ് ശതമാനം കൂടുതല്‍)
പാലക്കാട് - 562 (12 ശതമാനം കൂടുതല്‍)
മലപ്പുറം -737 (ഏഴ് ശതമാനം കുറവ് 0
കോഴിക്കോട് - 741 (20 ശതമാനം കുറവ് )
വയനാട് - 416 (45 ശതമാനം കുറവ് )
കണ്ണൂര്‍ - 971 (അഞ്ച് ശതമാനം കൂടുതല്‍)
കാസര്‍ഗോട് - 1247 (24 ശതമാനം കൂടുതല്‍)