പി.സി. തോമസ് പുതിയ പാര്ട്ടി രൂപീകരിക്കും
ദില്ലി: ദേശീയതലത്തില് പുതിയ രാഷ്ട്രീയപാര്ട്ടി രൂപീകരിക്കുമെന്ന് കേരള കോണ്ഗ്രസ് മാണി ഗ്രൂപ്പില് നിന്നും സസ്പെന്ഡ് ചെയ്യപ്പെട്ട പി.സി. തോമസ് എംപി പറഞ്ഞു. ജൂലായ് രണ്ട് തിങ്കളാഴ്ച ദില്ലിയില് വാര്ത്താസമ്മേളനത്തില് സംസാരിക്കുകയായിരുന്നു അദ്ദേഹം.
കര്ഷകരുടെ താല്പര്യങ്ങള്ക്കായിരിക്കും പുതുതായി രൂപീകരിക്കുന്ന പാര്ട്ടി മുന്ഗണന നല്കുക. എന്നാല് താന് രൂപീകരിച്ച ദേശീയ കര്ഷക മുന്നമി സ്വതന്ത്രസംഘടനയായി തുടരുമെന്നും തോമസ് വ്യക്തമാക്കി. പുതിയ പാര്ട്ടി രൂപീകരിക്കുന്നതുമായി ബന്ധപ്പെട്ട ചര്ച്ചകള്ക്കായി ദില്ലിയിലെത്തിയതായിരുന്നു തോമസ്.
ഇപ്പോള്ത്തന്നെ അഞ്ച് എംപിമാരുടെ പിന്തുണ തനിക്കുണ്ടന്ന് അവകാശപ്പെട്ട തോമസ് തന്നെ കേരള കോണ്ഗ്രസില് നിന്ന് സസ്പെന്ഡ് ചെയ്ത കാര്യം ഔദ്യോഗികമായി അറിയിച്ചിട്ടില്ലെന്ന് പറഞ്ഞു.
കഴിഞ്ഞ പഞ്ചായത്ത് തിരഞ്ഞെടുപ്പിലും നിയമസഭാ തിരഞ്ഞെടുപ്പിലും ബിജെപിയുമായി കേരള കോണ്ഗ്രസ് (എം) ഒളിഞ്ഞും തെളിഞ്ഞും ധാരണയുണ്ടാക്കിയിരുന്നുവെന്ന് തോമസ് ആവര്ത്തിച്ചു. താനും മാണിയും ചേര്ന്നാണ് ബിജെപി നേതാക്കളെ കണ്ടത്. ഇതിനുവേണ്ട തെളിവ് തന്റെ പക്കലുണ്ടെന്നും ആവശ്യമായാല് അത് വെളിവാക്കാന് തയ്യാറാണെന്നും അദ്ദേഹം വ്യക്തമാക്കി.
കേരള കോണ്ഗ്രസ് രൂപീകൃതമായ സമയത്തുണ്ടായിരുന്ന ക്രിസ്ത്യന്-നായര് അനുപാതം പുതിയ സഖ്യത്തിലൂടെ വീണ്ടും നിലവില് വരുത്തുകയായിരുന്നു ഈ നീക്കത്തിന്റെ പിന്നിലെന്നും അദ്ദേഹം പറഞ്ഞു.
അതിനിടെ യൂത്ത് ഫ്രണ്ട് (ജെ) സംസ്ഥാന ജനറല് സെക്രട്ടറി സോണി പോളിന്റെ നേതൃത്വത്തിലുള്ള ഒരു വിഭാഗം പ്രവര്ത്തകര് തോമസിന്റെ കര്ഷകമുന്നണിയില് ചേരുമെന്ന് പ്രഖ്യാപിച്ചു.