കപ്രിയാറ്റി തോറ്റു; വീനസ്-ഹെനിന് ഫൈനല്
ലണ്ടന്: നിലവിലെ ചാമ്പ്യനും രണ്ടാം സീഡുമായ അമേരിക്കയുടെ വീനസ് വില്യംസും എട്ടാം സീഡ് ബെല്ജിയത്തിന്റെ ജസ്റിന് ഹെനിനും 2001ലെ വിംബിള്ഡണ് വനിതാവിഭാഗം കിരീടത്തിനായി ഏറ്റുമുട്ടും. ജൂലായ് ഏഴ് ശനിയാഴ്ചയാണ് ഫൈനല്.
ജൂലായ് അഞ്ച് വ്യാഴാഴ്ച സെന്റര് കോര്ട്ടില് നടന്ന മത്സരത്തില് വീനസ് വില്യംസ് നാട്ടുകാരിയും 99ലെ ചാമ്പ്യനുമായ ലിന്ഡ്സെ ഡാവന് പോര്ട്ടിനെയാണ് തോല്പിച്ചത്. മൂന്നു സെറ്റ് നീണ്ട പോരാട്ടത്തില് 6-2, 6-7, 6-1 എന്ന സ്കോറിനാണ് ചാമ്പ്യന് വിജയം കണ്ടത്. ആദ്യസെറ്റ് എളുപ്പത്തില് നേടിയ വീനസിനെ രണ്ടാം സെറ്റ് ടൈബ്രേക്കറില് പിടിച്ചെടുത്തുകൊണ്ട് ഡാവന്പോര്ട്ട് ഞെട്ടിച്ചു. എന്നാല് മൂന്നാം സെറ്റില് ഡാവന്പോര്ട്ടിനൊരു അവസരവും കൊടുക്കാതെ വീനസ് മാച്ച് സ്വന്തമാക്കി.
ബെല്ജിയത്തിന്റെ ജസ്റിന് ഹെനിനായിരുന്നു വ്യാഴാഴ്ച വിംബിള്ഡണിലെ താരം. ആസ്ത്രേലിയന് ഓപ്പണ്, ഫ്രഞ്ച് ഓപ്പണ് എന്നീ കിരീടങ്ങള് നേടി വിംബിള്ഡണിനെത്തിയ അമേരിക്കക്കാരി ജെന്നിഫര് കപ്രിയാറ്റിയുടെ മോഹങ്ങളാണ് ഹെനില് തല്ലിക്കൊഴിച്ചത്. സ്കോര്: 2-6, 6-4, 6-2.
ബെല്ജിയത്തില് നിന്നുള്ള ഈ പത്തൊമ്പതുകാരിക്കെതിരെ ആദ്യസെറ്റില് മാത്രമേ കപ്രിയാറ്റിക്ക് എന്തെങ്കിലും ചെയ്യാന് സാധിച്ചുളളൂ. ആദ്യസെറ്റ് 6-2ന് നേടിക്കൊണ്ട് എളുപ്പത്തിലുള്ള ഒരു ജയം പ്രതീക്ഷിച്ച കപ്രിയാറ്റിയെ തീര്ത്തും നിഷ്പ്രഭമാക്കുന്ന പ്രകടനമായിരുന്നു ഹെനിന് അടുത്ത രണ്ടു സെറ്റുകളില് കാഴ്ചവച്ചത്. രണ്ടു സെറ്റും ടൈബ്രേക്കറിലേക്ക് നീങ്ങാതെത്തന്നെ ഹെനിന് സ്വന്തമാക്കി.