മാണി ഗ്രൂപ്പില്‍ പ്രതിസന്ധി ഉറഞ്ഞു കൂടുന്നു

കോട്ടയം: ചെയര്‍മാന്‍ സ്ഥാനവും മന്ത്രിസ്ഥാനവും ഒരാള്‍ തന്നെ വഹിക്കരുതെന്നാവശ്യപ്പെട്ട് വിമതവിഭാഗം തിരഞ്ഞെടുപ്പ് കമ്മീഷന് പരാതി നല്‍കിയതോടെ കേരള കോണ്‍ഗ്രസ് എമ്മിലെ ഗ്രൂപ്പുവഴക്ക് പുതിയ വഴിത്തിരിവിലെത്തി.

പാര്‍ട്ടിയില്‍ നിന്ന് സസ്പെന്‍ഡ് ചെയ്യപ്പെട്ട കേരള കോണ്‍ഗ്രസ് നേതാക്കളായ പി.സി. തോമസ്, സ്കറിയാ തോമസ് എന്നിവര്‍ നേതൃത്വം നല്‍കുന്ന വിഭാഗമാണ് പരാതിയുമായി തിരഞ്ഞെടുപ്പ് കമ്മീഷനെ സമീപിച്ചിരിക്കുന്നത്. പാര്‍ട്ടിയുടെ ഭരണഘടന പ്രകാരം ഈ രണ്ടു സ്ഥാനങ്ങളും ഒരേ ആള്‍ തന്നെ വഹിക്കാന്‍ പാടില്ലെന്ന് അവര്‍ ചൂണ്ടിക്കാട്ടി.

മന്ത്രി സി.എഫ്. തോമസാണ് ഇപ്പോള്‍ പാര്‍ട്ടിയുടെ ചെയര്‍മാന്‍ സ്ഥാനവും വഹിക്കുന്നത്. അടുത്തിടെ നടന്ന പാര്‍ട്ടിയുടെ സംസ്ഥാന കമ്മിറ്റി യോഗത്തില്‍ ഭരണഘടന മരവിപ്പിച്ചാണ് സി.എഫ്. തോമസിന്റെ ചെയര്‍മാന്‍ സ്ഥാനം നിലനിര്‍ത്തിയത്. ഇതിനെതിരെ പ്രതികരിച്ചതിനാല്‍ ഞങ്ങള്‍ പാര്‍ട്ടിയില്‍ നിന്ന് പുറത്തായി- സ്കറിയാ തോമസ് പറയുന്നു.

കേരള കോണ്‍ഗ്രസ് ഭരണഘടന പ്രകാരം സി.എഫ്. തോമസ് ഇപ്പോള്‍ ചെയര്‍മാന്‍ അല്ല. അതിനാല്‍ത്തന്നെ അദ്ദേഹത്തിന്റെ നടപടികള്‍ക്ക് സാധുതയുമില്ല - സ്കറിയാ തോമസ് ചൂണ്ടിക്കാട്ടി.

എന്നാല്‍ പാര്‍ട്ടിയില്‍ നിന്ന് പുറത്താക്കപ്പെട്ടവരായതു കൊണ്ട് പി.സി. തോമസിനും കൂട്ടര്‍ക്കും ഭരണഘടനയെ ചോദ്യം ചെയ്യാന്‍ അവകാശമില്ലമെന്നാണ് കേരള കോണ്‍ഗ്രസ് (എം) ഔദ്യോഗിക വക്താവ് ജോയി വര്‍ഗീസ് പറയുന്നത്.

എന്തായാലും ഭരണഘനടയെച്ചൊല്ലി വിമതവിഭാഗം തിരഞ്ഞൈടുപ്പ് കമ്മീഷനെ സമീപിച്ചതോടെ മാണി ഗ്രൂപ്പില്‍ ഉടലെടുത്തിട്ടുള്ള പ്രതിസന്ധി ഉടനൊന്നും പരിഹൃതമാകില്ല എന്നു വ്യക്തമായി.