കേസ് നായനാര്‍ സര്‍ക്കാര്‍ കെട്ടിച്ചമച്ചത്: എംവിആര്‍

തിരുവനന്തപുരം: കൂത്തുപറമ്പ് കേസ് തനിക്കെതിരെ നായനാര്‍ സര്‍ക്കാര്‍ കെട്ടിച്ചമച്ചതാണെന്ന് മന്ത്രി എം.വി. രാഘവന്‍ പറഞ്ഞു. കൂത്തുപറമ്പ് വെടിവെപ്പ് കേസിലെ എഫ്ഐആര്‍ സുപ്രീം കോടതി തള്ളിയതിനെക്കുറിച്ച് ജൂലായ് 12 വ്യാഴാഴ്ച തിരുവനന്തപുരത്ത് വാര്‍ത്താലേഖകരോട് പ്രതികരിക്കുകയായിരുന്നു അദ്ദേഹം.

മന്ത്രിയെയും പൊലീസിനെയും ആക്രമിച്ച കാര്യമൊന്നും എഫ്ഐആറില്‍ ഇല്ല. നായനാര്‍ സര്‍ക്കാരും സിപിഎമ്മും ചേര്‍ന്ന് തന്നെ ഇല്ലാതാക്കാന്‍ ശ്രമിച്ച നീക്കമാണ് കൂത്തുപറമ്പ് കേസ്. തികച്ചും രാഷ്ട്രീയ പകപോക്കലാണ് ഇതിനു പിന്നിലെ ലക്ഷ്യം - രാഘവന്‍ ആരോപിച്ചു.

പണ്ട് നാസികള്‍ എതിരാളികളെ ക്രൂശിപ്പിച്ചതുപോലെയാണ് എന്നെ നായനാര്‍ സര്‍ക്കാര്‍ വേദനിപ്പിച്ചത്. മന്ത്രിമാരെ തടഞ്ഞതിന്റെ പേരില്‍ കൊലപാതകത്തിന് ഉത്തരം പറയേണ്ടിവരികയാണെങ്കില്‍ ആദ്യം കുടുങ്ങുക നായനാരാണ് - രാഘവന്‍ പറഞ്ഞു.

സുപ്രീം കോടതി വിധിയോടെ തനിക്ക് നീതി കിട്ടിയെന്ന് അദ്ദേഹം പറഞ്ഞു. ബന്ധപ്പെട്ടവര്‍ക്കെതിരെ മാനനഷ്ടക്കേസ് ഫയല്‍ ചെയ്യാനും ആലോചിക്കുന്നുണ്ടെന്ന് രാഘവന്‍ വ്യക്തമാക്കി.