വിദേശമലയാളികളുടെ പേര് റേഷന്‍കാര്‍ഡില്‍ ചേര്‍ക്കാം

തിരുവനന്തപുരം: പുതിയ റേഷന്‍ കാര്‍ഡുകളിലും വിദേശമലയാളികളുടെ പേര് ചേര്‍ക്കാനാവുമെന്ന് സിവില്‍ സപ്ലൈസ് വകുപ്പ് മന്ത്രി ജി.കാര്‍ത്തികേയന്‍ നിയമസഭയെ അറിയിച്ചു.

പുതിയ റേഷന്‍ കാര്‍ഡുകള്‍ അടുത്ത വര്‍ഷം ജനുവരിയോടെ പ്രാബല്യത്തില്‍ വരും. പുതിയ കാര്‍ഡുകള്‍ക്കായുള്ള സത്യവാങ്മൂലത്തില്‍ സംസ്ഥാനത്തിന് പുറത്തുള്ളവരുടെയും പേര് ചേര്‍ക്കാനുള്ള കോളം ചേര്‍ത്തിട്ടുണ്ട്. ഇവരുടെ പേര് കാര്‍ഡില്‍ ഉള്‍പ്പെടുത്തും. പുറത്തുള്ളവര്‍ നാട്ടില്‍ തിരിച്ചെത്തി താമസം തുടങ്ങിയാല്‍ അവര്‍ക്ക് അര്‍ഹപ്പെട്ട റേഷന്‍ ആനുകൂല്യങ്ങള്‍ ലഭിക്കുമെന്ന് മന്ത്രി അറിയിച്ചു.

കെ.വി.കുഞ്ഞിരാമന്‍, എം.വി.ഗോവിന്ദന്‍ മാസ്റര്‍, വി.കെ.ചന്ദ്രന്‍ എന്നിവരുടെ ചോദ്യങ്ങള്‍ക്ക് മറുപടി പറയുകയായിരുന്നു മന്ത്രി.

പുതിയ റേഷന്‍ കാര്‍ഡുകള്‍ തയ്യാറാക്കുന്നതിന്റെ ആദ്യജോലികള്‍ പൂര്‍ത്തിയായതായി മന്ത്രി പറഞ്ഞു. 63 ലക്ഷത്തില്‍ പരം റേഷന്‍കാര്‍ഡുകളാണ് ഇപ്പോള്‍ സംസ്ഥാനത്തുള്ളത്. പുതിയ കാര്‍ഡുകള്‍ 70 ലക്ഷത്തിലേറെ വരും.