അജിത്സിംഗ് കേന്ദ്രമന്ത്രിയായി സ്ഥാനമേല്‍ക്കും

ദില്ലി: കേന്ദ്രക്യാബിനറ്റ് മന്ത്രിയായി രാഷ്ട്രീയ ലോക്ദള്‍ നേതാവ് അജിത്സിംഗ് ജൂലായ് 22 ഞായറാഴ്ച സത്യപ്രതിജ്ഞ ചെയ്യും. ഞായറാഴ്ച വൈകുന്നേരം രാഷ്ട്രപതി ഭവനില്‍ വെച്ച് ആറ് മണിക്കാണ് സത്യപ്രതിജ്ഞാച്ചടങ്ങ്.

കൃഷിവകുപ്പായിരിക്കും അജിത്സിംഗിന് ലഭിക്കുക എന്നാണ് ഔദ്യോഗികവൃത്തങ്ങള്‍ നല്‍കുന്ന സൂചന. നിതീഷ്കുമാറാണ് ഇപ്പോള്‍ ഈ വകുപ്പിന്റെ ചുമതല വഹിക്കുന്നത്.

രാഷ്ട്രീയലോക്ദളിനെ ദേശീയ ജനാധിപത്യ സഖ്യത്തില്‍ ചേര്‍ക്കുന്നതിന്റെ ഭാഗമായാണ് അജിത്സിംഗിന്റെ മന്ത്രിസഭാ പ്രവേശം. ഉത്തര്‍പ്രദേശ് നിയമസഭാ തിരഞ്ഞെടുപ്പ് ആസന്നമായ സാഹചര്യത്തില്‍ സംസ്ഥാനത്ത് ബിജെപിയുടെ നില മെച്ചപ്പെടുത്താനുള്ള ശ്രമമെന്ന നിലയിലാണ് അജിത്സിംഗിന് മന്ത്രിസഭയില്‍ സ്ഥാനം നല്‍കുന്നതെന്ന് രാഷ്ട്രീയവൃത്തങ്ങള്‍ നിരീക്ഷിക്കുന്നു.

അജിത്സിംഗിന് പുറമെ മറ്റ് ചില മന്ത്രിമാരും സത്യപ്രതിജ്ഞ ചെയ്ത് സ്ഥാനമേല്‍ക്കും. കേന്ദ്രമന്ത്രിസഭയില്‍ ഇപ്പോഴുള്ള അഞ്ച് ഒഴിവുകള്‍ നികത്തയിയേക്കുമെന്നാണ് അറിയുന്നത്.