ഫൂലന്ദേവി വെടിയേറ്റു മരിച്ചു
ദില്ലി: മുന് ചമ്പല്ക്കൊള്ളക്കാരിയും ഇപ്പോള് സമാജ്വാദി പാര്ട്ടി എംപിയുമായ ഫൂലന്ദേവി വെടിയേറ്റുമരിച്ചു. ദില്ലിയില് അശോകാറോഡിലുള്ള അവരുടെ ഔദ്യോഗിക വസതിയ്ക്ക് മുന്നില് വച്ചാണ് ജൂലായ് 25 ബുധനാഴ്ച പകല് ഫൂലന്ദേവിക്ക് വെടിയേറ്റത്.
വെടിയേറ്റ് വീണ അവരെ രാം മനോഹര് ലോഹ്യാ ആശുപത്രിയില് കൊണ്ടുപോയെങ്കിലും രക്ഷിക്കാനായില്ല. കാറിലെത്തിയ അജ്ഞാതസംഘമാണ് ഫൂലന്ദേവിയെ വെടിവെച്ചത്. യന്ത്രത്തോക്കുപയോഗിച്ച് നിരവധി റൗണ്ട് വെടിവെച്ചതായി പറയുന്നു. തലയില് നാല് വെടിയുണ്ടകള് തുളഞ്ഞുകയറിയിട്ടുണ്ട്.
ബുധനാഴ്ച പാര്ലമെന്റ് മന്ദിരത്തില് നിന്ന് ഒരു കിലോമീറ്റര് മാത്രം അകലെയുള്ള വീട്ടിലേക്ക് മാരുതികാറില് ഉച്ചയ്ക്ക് 1:40ന് വീട്ടിലേക്കു മടങ്ങിവരികയായിരുന്നു ഫൂലന്ദേവി. രാവിലെ അവര് ലോക്സഭയില് ഹാജരായിരുന്നു. കാര് വീട്ടിലേക്ക് തിരിച്ച ഉടനെയാണ് പതിയിരുന്ന അജ്ഞാത അക്രമിസംഘം തുരുതുരാ നിറയൊഴിക്കാന് ആരംഭിച്ചത്.
ഫൂലന്ദേവിയുടെ ഗണ്മാന് വിരേന്ദ്രസിംഹും അക്രമികള്ക്കെതിരെ നിറയൊഴിച്ചു. രക്തത്തില് കുളിച്ച് ഫൂലന്ദേവി നിലത്തുവീണയുടന് അക്രമിസംഘം കാറില് രക്ഷപ്പെട്ടു. ഗണ്മാന് വീരേന്ദ്രസിംഹിന്റെയും നില ഗുരുതരമാണ്.
ഫൂലന്ദേവിയുടെ മരണവാര്ത്തയില് അനുശോചചിച്ച് ലോക്സഭ നടപടികള് നിര്ത്തിവച്ച് പിരിഞ്ഞു. മിര്സാപൂരില് നിന്നുള്ള ലോക്സഭാംഗമാണ് ഫൂലന്ദേവി.
അക്രമികള്ക്ക് വേണ്ടി നഗരത്തില് വ്യാപകമായ തിരച്ചില് നടക്കുകയാണ്. നഗരത്തില് നിന്നും പുറത്തേക്കുള്ള എല്ലാ മാര്ഗങ്ങളും പൊലീസ് അടച്ചിരിക്കുകയാണ്.