ഫൂലന്‍ വധം: പങ്കജ് സിംഹ് കീഴടങ്ങി

ദില്ലി: ഫൂലന്‍ ദേവിയുടെ വധത്തില്‍ പൊലീസ് സംശയിക്കുന്ന പങ്കജ് സിംഹ് എന്ന ഷേര്‍ സിംഹ് റാണ പൊലീസിന് കീഴടങ്ങി. ജൂലായ് 27 വെള്ളിയാഴ്ച രാവിലെ ഡെഹ്റാഡൂണ്‍ പൊലീസിന് മുന്നിലാണ് റാണ കീഴടങ്ങിയത്.

ഫൂലന്‍ദേവിയെ വെടിവച്ചു വീഴ്ത്തിയത് താനാണെന്ന് റാണ സമ്മതിച്ചതായി റിപ്പോര്‍ട്ടുകളുണ്ട്. കൊലയാളികളുടെ സംഘത്തില്‍ രവീന്ദര്‍ എന്നൊരാളും ഉണ്ടായിരുന്നതായി റാണ പൊലീസിനോട് പറഞ്ഞു. അറസ്റ് ചെയ്ത് ദില്ലിയിലേക്ക് കൊണ്ടുവരുന്ന റാണയെ ക്രൈംബ്രാഞ്ച് കൂടുതല്‍ ചോദ്യം ചെയ്യും.

ഫൂലന്റെ അശോക റോഡിലുള്ള വീടിനു മുന്നില്‍ അക്രമികള്‍ എത്തിയ പച്ച മാരുതി കാറിന്റെ ഡ്രൈവറായാരിന്നു റാണ. ഈ കാറിലാണ് കൊലയാളികള്‍ രക്ഷപ്പെട്ടത്. അശോക റോഡില്‍ നിന്ന് രക്ഷപ്പെട്ട ശേഷം മഹാദേവ റോഡില്‍വച്ച് കൊലയാളികള്‍ കാര്‍ ഉപേക്ഷിച്ച് ഒരു ഓട്ടോറിക്ഷയില്‍ രക്ഷപ്പെട്ടുവെന്നാണ് പൊലീസിന്റെ സംശയം. കൊല നടന്ന ജൂലായ് 25 ബുധനാഴ്ച രാവിലെ ഫൂലന്‍ ദേവിയെ പാര്‍ലമെന്റില്‍ കൊണ്ടു വിട്ടതും ഇതേ കാറിലാണ്.

ഫൂലന്‍ ദേവിയുടെ മരണശേഷം റാണയുടെ വീട്ടിലുള്ള എല്ലാവരും ഒളിവില്‍ പോവുകയും മദ്യഷാപ്പ് അടച്ചിടുകയും ചെയ്തതായി പൊലീസ് പറഞ്ഞു. കൊലപാതകത്തിനു ശേഷം ദില്ലി പൊലീസ് കാര്‍ പരിശോധിച്ച് പങ്കജ് സിംഹ് റാണയുടേതാണെന്ന് തിട്ടപ്പെടുത്തി. എന്നാല്‍ ഉത്തരാഞ്ചല്‍ പൊലീസിന്റെ നിഗമനപ്രകാരം കാര്‍ ഷേര്‍ സിംഹ് റാണയുടേതായിരുന്നു. തുടര്‍ന്നാണ് പങ്കജ് സിംഹും ഷേര്‍ സിംഹും ഒരാളാണെന്ന നിഗമനത്തില്‍ പൊലീസ് എത്തിയിരിക്കുന്നത്.

ഫൂലന്‍ ദേവിയുടെ സന്തതസഹചാരിയും സമാജ്വാദി പാര്‍ട്ടി നേതാവുമായ ഉമാ കാശ്യപിന്റെ ദത്ത് സഹോദരനാണ് പങ്കജ് സിംഹ് എന്ന ഷേര്‍സിംഹ് റാണ.