'മുഷാറഫിന്റെ പ്രസ്താവന ഭാവി ചര്‍ച്ചകളെ ബാധിക്കും'

ദില്ലി: ആഗ്ര ഉച്ചകോടി സംബന്ധിച്ച് പാകിസ്ഥാന്‍ പ്രസിഡണ്ട് പര്‍വേസ് മുഷാറഫ് നടത്തുന്ന ചില വാസ്തവവിരുദ്ധമായ പ്രസ്താവനകള്‍ ഇന്ത്യയും പാകിസ്ഥാനും തമ്മിലുള്ള ഭാവി ചര്‍ച്ചകളെ ബാധിക്കുമെന്ന് പ്രധാനമന്ത്രി അടല്‍ ബിഹാരി വാജ്പേയി മുന്നറിയിപ്പ് നല്‍കി.

ഇന്ത്യന്‍ സര്‍ക്കാരിന്റെ തലപ്പത്തിരിക്കുന്നവരില്‍ ഉണ്ടായ അഭിപ്രായവ്യത്യാസമാണ് ആഗ്ര ഉച്ചകോടിയില്‍ സംയുക്തപ്രഖ്യാപനം നടത്താന്‍ തടസ്സമായതെന്ന് മുഷാറഫിന്റെ പ്രസ്താവനയോട് പ്രതികരിക്കുകയായിരുന്നു പ്രധാനമന്ത്രി. ''രണ്ടു രാജ്യങ്ങളും തമ്മിലുള്ള ഭാവി ചര്‍ച്ചകള്‍ക്ക് തടസ്സങ്ങള്‍ സൃഷ്ടിക്കാന്‍ മാത്രമേ ഇത്തരത്തിലുള്ള പ്രസ്താവനകള്‍ ഉപകരിക്കുകയുളളൂ'', കാര്‍ഗില്‍ വിജയദിനത്തോടനുബന്ധിച്ച് ജൂലായ് 26 വ്യാഴാഴ്ച വൈകീട്ട് പ്രധാനമന്ത്രി പറഞ്ഞു.

ഉച്ചകോടിയില്‍ പങ്കെടുത്ത ഇന്ത്യന്‍ പ്രതിനിധികള്‍ ഒറ്റക്കെട്ടായിരുന്നുവെന്ന് പ്രധാനമന്ത്രി വ്യക്തമാക്കി. ''തീവ്രവാദികളെ സ്വാതന്ത്യ്രപോരാളികള്‍ എന്നു വിളിക്കാന്‍ ഒരു പ്രതിനിധിയും ഇഷ്ടപ്പെടുന്നില്ല. അതിര്‍ത്തി തീവ്രവാദത്തെ ആര്‍ക്കും അവഗണിക്കാനും പറ്റില്ല.''

പാകിസ്ഥാന്‍ ജയിലില്‍ ഇപ്പോഴും 54 ഇന്ത്യന്‍ യുദ്ധത്തടവുകാര്‍ ഉണ്ടെന്ന് വാജ്പേയി ആവര്‍ത്തിച്ചു. ഇതിന്റെ വിശദവിവരങ്ങള്‍ ശേഖരിച്ച് പാകിസ്ഥാന് അയച്ചുകൊടുക്കുമെന്നും പ്രധാനമന്ത്രി വ്യക്തമാക്കി.