വാജ്പേയിക്ക് എന്‍ഡിഎ പിന്തുണ

ദില്ലി: പ്രധാനമന്ത്രി വാജ്പേയിയുടെ നേതൃത്വത്തിന് ദേശീയ ജനാധിപത്യ സഖ്യം പൂര്‍ണ പിന്തുണ പ്രഖ്യാപിച്ചു.

ഒരു മണിക്കൂര്‍ നീണ്ടുനിന്ന യോഗം വാജ്പേയിക്ക് പൂര്‍ണ പിന്തുണ പ്രഖ്യാപിച്ചാണ് പിരിഞ്ഞതെന്ന് വാര്‍ത്താവിനിമയമന്ത്രി രാംവിലാസ് പാസ്വന്‍ വാര്‍ത്താലേഖകരെ അറിയിച്ചു.

എന്‍ഡിഎയിലെ ഘടകകക്ഷികള്‍ക്കായി പെരുമാറ്റച്ചട്ടമുണ്ടാക്കാന്‍ ഒരു സമിതിയെ നിയോഗിക്കാനും യോഗം തീരുമാനിച്ചു. എന്‍ഡിഎ കണ്‍വീനര്‍ ജോര്‍ജ് ഫെര്‍ണാണ്ടസ്, സികന്ദര്‍ ഭക്ത്, മുരശൊലി മാരന്‍, അരുണ്‍ ചരണ്‍ സേത്തി എന്നിവരാണ് സമിതിയിലെ അംഗങ്ങള്‍.

യോഗത്തില്‍ ശിവസേനാ പ്രതിനിധി പങ്കെടുത്തില്ല. ശിവസേനാ എംപി സഞ്ജയ് നിരുപമാണ് കഴിഞ്ഞ ദിവസം യുടിഐ കുംഭകോണത്തില്‍ പ്രധാനമന്ത്രിയുടെ ഓഫീസിന് പങ്കുണ്ടെന്ന് ആരോപിച്ചത്.

യുടിഐ കുംഭകോണത്തെ പറ്റി പ്രധാനമന്ത്രി ബുധനാഴ്ച പാര്‍ലമെന്റില്‍ ഒരു സമ്പൂര്‍ണ പ്രസ്താവനയിറക്കുമെന്നാണ് പ്രതീക്ഷിക്കുന്നത്. ഇക്കാര്യത്തില്‍ ധനകാര്യമന്ത്രി യശ്വന്ത്സിന്‍ഹ പാര്‍ലമെന്റില്‍ പ്രസ്താവന നടത്തണമെന്ന് പ്രതിപക്ഷം ആവശ്യപ്പെട്ടിട്ടുണ്ട്.