'പി.ടി.ചാക്കോയുടെ പേരില്‍ പ്രസ്ഥാനമുണ്ടാക്കരുത്'

കോട്ടയം: പി.ടി.ചാക്കോയുടെ പേരില്‍ ഒരു ബദല്‍ പ്രസ്ഥാനം ഉണ്ടാക്കാനുള്ള ശ്രമത്തില്‍ നിന്ന് അദ്ദേഹത്തിന്റെ മകനായ പി.സി.തോമസ് പിന്തിരിയണമെന്ന് കേരള കോണ്‍ഗ്രസ് (എം) നേതാവും റവന്യൂമന്ത്രിയുമായ കെ.എം.മാണി ആവശ്യപ്പെട്ടു.

പി.ടി.ചാക്കോയുടെ 37-ാം ചരമവാര്‍ഷിക ദിനമായ ആഗസ്ത് ഒന്ന് ബുധനാഴ്ച കോട്ടയത്ത് പി.ടി.ചാക്കോ അനുസ്മരണ പ്രഭാഷണം നടത്തുകയായിരുന്നു മാണി. പി.ടി.ചാക്കോയുടെ ചരമവാര്‍ഷികം ഇതേവരെ ആഘോഷിച്ചിട്ടുള്ളത് കേരള കോണ്‍ഗ്രസ് മാത്രമാണ്. കേരള കോണ്‍ഗ്രസിന്റെ ആത്മീയഗുരുനാഥനാണ് പി.ടി.ചാക്കോ.-- മാണി പറഞ്ഞു.

പി.ടി.ചാക്കോയുടെ പ്രതിമയില്‍ കേരള കോണ്‍ഗ്രസ് (എം) നേതാക്കളും പി.സി.തോമസ് രൂപീകരിച്ച നാഷണല്‍ ഫെഡറല്‍ ഡെമോക്രാറ്റിക്ക് പാര്‍ട്ടി പ്രവര്‍ത്തകരും പുഷ്പാര്‍ച്ചന നടത്തി. ഇരുവിഭാഗങ്ങളും ഒരേ സമയത്ത് പുഷ്പാര്‍ച്ചന നടത്താനെത്തിയത് സംഘര്‍ഷത്തിനിടയാക്കിയെങ്കിലും ശക്തമായ പൊലീസ് സന്നാഹമുണ്ടായിരുന്നതുകൊണ്ട് സംഘര്‍ഷം ഒഴിവായി.