'ആര്സിസി പ്രശ്നം പക്വതയോടെ കൈകാര്യം ചെയ്യണം'
തിരുവനന്തപുരം: തിരുവനന്തപുരത്തെ റീജിയണല് കാന്സര് സെന്ററിനെതിരെയുള്ള ആരോപണങ്ങള് പക്വതയോടെ കൈകാര്യം ചെയ്യേണ്ടതാണെന്ന് മുഖ്യമന്ത്രി എ. കെ. ആന്റണി.
ആര്സിസിയുടെ പ്രവര്ത്തനത്തില് എന്തെങ്കിലും തെറ്റുണ്ടായിട്ടുണ്ടെങ്കില് അത് തിരുത്തണം. എന്നാല് അത് ആ സ്ഥാപനത്തെ നശിപ്പിക്കുന്ന തരത്തിലാകരുതെന്നാണ് ആര്സിസി ചെയര്മാന് എന്ന നിലയില് തന്റെ അഭിപ്രായമെന്ന് ആന്റണി വ്യക്തമാക്കി.
പ്രശ്നത്തെ കുറിച്ച് അന്വേഷിക്കാന് ഡോ. പരീഖിനെ വച്ചത് ആരെയും സഹായിക്കാനല്ല. പരീഖിന്റെ പേര് നിര്ദേശിച്ചത് കൃഷ്ണന്നായരുമല്ല. സര്ക്കാരിന് ആരെയും സംരക്ഷിക്കണമെന്നില്ല, ആരോടും ശത്രുതയുമില്ല. ആ സ്ഥാപനത്തിനുള്ളിലെ പ്രശ്നങ്ങള് അവിടെയുള്ള ഡോക്ടര്മാര് ഒരു ജനകീയപ്രശ്നമാക്കി മാറ്റിയത് തെറ്റായ കീഴ്വഴക്കമാണെന്ന് ആന്റണി ചൂണ്ടിക്കാട്ടി.
ആര്സിസിയിലെ പ്രശ്നങ്ങള് അവതരിപ്പിക്കാന് ചില ഡോക്ടര്മാര് തന്നെ വന്ന് കണ്ടിരുന്നതായും ആന്റണി വെളിപ്പെടുത്തി.