ഇന്തോ-പാക് സെക്രട്ടറിമാര്‍ ചര്‍ച്ച നടത്തും

കൊളംബോ: ശ്രീലങ്കന്‍ തലസ്ഥാനമായ കൊളംബോയില്‍ ഈയാഴ്ച അവസാനം നടക്കുന്ന സാര്‍ക്ക് വിദേശകാര്യ സെക്രട്ടറിമാരുടെ യോഗത്തില്‍ ഇന്ത്യയുടെയും പാകിസ്ഥാന്റെയും വിദേശകാര്യ സെക്രട്ടറിമാര്‍ ചര്‍ച്ച നടത്തും. ആഗ്ര ഉച്ചകോടിക്കു ശേഷം ഇരുരാജ്യങ്ങളും തമ്മില്‍ നടക്കുന്ന ഉന്നതതല ചര്‍ച്ചയായിരിക്കും ഇത്.

ആഗസ്ത് ഒമ്പത് വ്യാഴാഴ്ച ശ്രീലങ്കന്‍ വിദേശകാര്യമന്ത്രി ലക്ഷ്മണ്‍ കഡിര്‍ഗമാര്‍ യോഗം ഉദ്ഘാടനം ചെയ്യും. രണ്ട് ദിവസം നീണ്ടുനില്‍ക്കുന്ന യോഗത്തില്‍ സാര്‍ക്കിലെ ഏഴ് അംഗരാഷ്ട്രങ്ങളുടെയും വിദേശകാര്യ സെക്രട്ടറിമാര്‍ പങ്കെടുക്കും.

ഇന്ത്യയുടെ സംഘത്തെ നയിക്കുന്നത് വിദേശകാര്യ സെക്രട്ടറി ചൊകില അയ്യരാണ്. പാകിസ്ഥാന്‍ സംഘത്തെ ഇമാനുള്‍ ഹഖ് നയിക്കും. വിദേശകാര്യ സെക്രട്ടറമാര്‍ കഴിഞ്ഞമാസം യോഗം ചേരാന്‍ തീരുമാനിച്ചിരുന്നെങ്കിലും നേപ്പാളിലെ ബീരേന്ദ്രരാജാവിന്റെ കൊലപാതകത്തെത്തുടര്‍ന്ന് മാറ്റിവക്കുകയായിരുന്നു.

അടുത്ത സാര്‍ക്ക് ഉച്ചകോടി നടത്തുന്ന കാര്യത്തിലായിരിക്കും വിദേശകാര്യ സെക്രട്ടറിമാരുടെ യോഗം കാര്യമായ പ്രാധാന്യം നല്‍ക്കുക. 1999 നവംബറില്‍ നേപ്പാളില്‍ വച്ച് ഉച്ചകോടി നടത്താന്‍ ഉദ്ദേശിച്ചിരുന്നെങ്കിലും അനിശ്ചിതമായി നീട്ടിവക്കുകയായിരുന്നു.