സ്കൂളില്‍ പോകേണ്ടെന്നു പറഞ്ഞു; വിദ്യാര്‍ത്ഥി തൂങ്ങിമരിച്ചു

തൃശൂര്‍: സ്കൂളില്‍ പോകാന്‍ മാതാപിതാക്കള്‍ അനുവദിക്കാത്തതിനെത്തുടര്‍ന്ന് 10 വയസ്സുകാരനായ വിദ്യാര്‍ത്ഥി തൂങ്ങിമരിച്ചു. തൃശൂര്‍ ജില്ലയില്‍ ഒല്ലൂര്‍ എളംതുരുത്തി എടക്കുന്നിക്കാരന്‍ കുട്ടന്റെ മകന്‍ സനീഷാണ് (10) തുങ്ങിമരിച്ചത്.

കടുത്ത പനിമൂലം രണ്ടു ദിവസമായി സനീഷ് സ്കൂളില്‍ പോയിരുന്നില്ല. ആഗസ്ത് എട്ട് ബുധനാഴ്ച രാവിലെത്തന്നെ സനീഷ് സ്കൂളില്‍ പോകാനൊരുങ്ങി. എന്നാല്‍ പനി പൂര്‍ണമായും വിട്ടുമാറാത്തതുകൊണ്ട് സ്കൂളില്‍ പോകുന്നത് അച്ഛനമ്മമമാര്‍ വിലക്കി. അച്ഛനും അമ്മയും ജോലിക്കു പോയ സമയത്ത് സനീഷ് വീട്ടിനുള്ളിലെ കഴുക്കോലില്‍ തൂങ്ങുകയായിരുന്നു.

സഹോദരി അമ്പിളിയാണ് സനീഷ് തൂങ്ങിമരിച്ച നിലയില്‍ കണ്ടെത്തിയത്. അമ്പിളിയുടെ നിലവിളി കേട്ട് ഓടിക്കൂടിയ നാട്ടുകാര്‍ ചേര്‍ന്ന് സനീഷിനെ കെട്ടഴിച്ച് അടുത്തുളള ജൂബിലി മിഷന്‍ ആശുപത്രിയിലെത്തിച്ചു. എന്നാല്‍ ആശുപത്രിയിലെത്തുമ്പോഴേക്കും സനീഷ് മരിച്ചുകഴിഞ്ഞിരുന്നു.