കുരിയാര്‍കുറ്റി പദ്ധതിക്ക് അനുമതികിട്ടിയേക്കും

ദില്ലി: കാരപ്പാറ-കുരിയാര്‍കുറ്റി ജലവൈദ്യുതപദ്ധതിയ്ക്ക് കേന്ദ്രം അനുമതി നല്കാന്‍ സാധ്യതയുണ്ടെന്ന് വൈദ്യുതിമന്ത്രി കടവൂര്‍ ശിവദാസന്‍ പറഞ്ഞു. ആഗസ്ത് ഒമ്പത് വ്യാഴാഴ്ച കേന്ദ്രമന്ത്രിമാരെ സന്ദര്‍ശിച്ച ശേഷം വാര്‍ത്താസമ്മേളനത്തില്‍ സംസാരിക്കുകയായിരുന്നു മന്ത്രി.

480 മെഗാവാട്ടിന്റെ പൂയംകുട്ടി പദ്ധതിസംബന്ധിച്ച് സംസ്ഥാനം നല്കിയ പുതുക്കിയ പദ്ധതിയ്ക്കും കേന്ദ്രസര്‍ക്കാര്‍ അനുമതി നല്കാന്‍ സാധ്യതയുണ്ടെന്നും അദ്ദേഹം പറഞ്ഞു. കേന്ദ്ര വനം-പരിസ്ഥിതി മന്ത്രി ടി.ആര്‍. ബാലുവുമായി ഈ രണ്ടു പദ്ധതികളുടെയും പ്രായോഗിക സാധ്യതകളെക്കുറിച്ച് വ്യാഴാഴ്ച മന്ത്രി ശിവദാസന്‍ ചര്‍ച്ചനടത്തി. വെള്ളത്തിനടിയിലാവുന്ന കാടിന്റെ വ്യാപ്തി 44 ശതമാനം കുറച്ചുകൊണ്ടാണ് പൂയംകുട്ടി പദ്ധതിസംബന്ധിച്ച് ഒരു പുതിയ പദ്ധതി റിപ്പോര്‍ട്ട് സമര്‍പ്പിച്ചിട്ടുള്ളത്. ഇതുമൂലം പൂയംകുട്ടി പദ്ധതിയില്‍ നേരത്തെ പ്രതീക്ഷിച്ചിരുന്ന വൈദ്യുതിയില്‍ 11 ശതമാനം കുറവു വരും.

വെള്ളത്തിനടിയിലാകുന്ന വനത്തിന്റെ വിസ്തൃതി കുറച്ചുകൊണ്ട് തയ്യാറാക്കിയ പുതിയ പദ്ധതിയുടെ പരിസ്ഥിതി പ്രത്യാഘാതത്തെപ്പറ്റി ട്രോപ്പിക്കല്‍ ബൊട്ടാണിക്കല്‍ ഗാര്‍ഡന്‍ ആന്റ് റിസര്‍ച്ച ് ഇന്‍സ്റിട്യൂട്ട് (ടിബിജിആര്‍ഐ) പഠനം നടത്തുമെന്നും അദ്ദേഹം പറഞ്ഞു. ഈ റിപ്പോര്‍ട്ട് നവമ്പറോടെ തയ്യാറാകും. നേരത്തെ സൈലന്റ്വാലി പദ്ധതിയ്ക്ക് അനുമതി നിഷേധിച്ചതോടൊപ്പം കേന്ദ്രം തള്ളിയ പദ്ധതിയായിരുന്നു കാരപ്പാറ- കരിയാര്‍കുറ്റി പദ്ധതിയെങ്കിലും ഇക്കുറി അതിന് അനുമതി ലഭിക്കുമെന്ന് തനിക്ക് പ്രതീക്ഷയുണ്ടെന്നും ശിവദാസന്‍ അഭിപ്രായപ്പെട്ടു.

മാനന്തവാടി, കേരളഭവാനി, പണ്ടിയാര്‍ പുന്നപ്പുഴ, ചോലത്തിപ്പുഴ എന്നീ പദ്ധതികളും കഴിയുന്നതും വേഗം അനുവദിച്ച് തരാന്‍ കേന്ദ്രത്തിനോടാവശ്യപ്പെട്ടിട്ടുണ്ടെന്നും മന്ത്രി അറിയിച്ചു.