ശിവസേനയുടെ നിര്‍ണായകയോഗം ഇന്ന്

മുംബൈ: ബിജെപിയുമായി സഖ്യത്തിന്റെ ഭാവി നിശ്ചയിക്കാന്‍ ശിവസേനാ നേതാവ് ബാല്‍താക്കറെയും പാര്‍ട്ടി എംപിമാരും ഇന്ന് (ആഗസ്ത് 10 വെള്ളിയാഴ്ച) മുംബൈയില്‍ നിര്‍ണായകയോഗം ചേരും.

യുടിഐ കുംഭകോണ വിവാദത്തില്‍ പ്രധാനമന്ത്രിയുടെ ഓഫീസിന് ബന്ധമുണ്ടെന്ന് സേന എംപി സഞ്ജയ് നിരുപം പരസ്യമായി പ്രഖ്യാപിച്ചതോടെയാണ് ഇരുപാര്‍ട്ടികളും തമ്മിലുള്ള ബന്ധം വഷളായത്. ഇതിനെത്തുടര്‍ന്ന് പ്രധാനമന്ത്രി അടല്‍ ബിഹാരി വാജ്പേയി രാജിവെക്കാന്‍ സന്നദ്ധത പ്രകടിപ്പിക്കുകയും എന്‍ഡിഎ സഖ്യകക്ഷികളുടെ അഭ്യര്‍ത്ഥന പ്രകാരം ഈ നീക്കത്തില്‍നിന്ന് പിന്തിരിയുകയുമായിരുന്നു.

അതിനു ശേഷം നിരുപം പ്രധാനമന്ത്രിയെക്കണ്ട് മാപ്പ് പറഞ്ഞിരുന്നു. എന്നാല്‍ താന്‍ ബാല്‍ താക്കറെയും നിര്‍ദ്ദേശപ്രകാരമാണ് മാപ്പു പറഞ്ഞതെന്നും തന്റെ ആരോപണം ഇപ്പോഴും നിലനില്‍ക്കുന്നുവെന്നും അദ്ദേഹം വീണ്ടും പ്രഖ്യാപിച്ചു. നിരുപം നടത്തിയ പരാമര്‍ശത്തെ എതിര്‍ക്കുന്ന നല്ലൊരു വിഭാഗം എംപിമാര്‍ ശിവസേനയില്‍ ഉണ്ടെന്നാണ് കരുതുന്നത്.

ഇതിനു പുറമെ മഹാരാഷ്ട്രാ സര്‍ക്കാരിനെ അട്ടിമറിക്കുന്ന കാര്യത്തിലും ബിജെപിയും ശിവസേനയും അഭിപ്രായവ്യത്യാസങ്ങളുണ്ടായിട്ടുണ്ട്. എന്‍സിപി സര്‍ക്കാരിനെ അട്ടിമറിക്കാനുള്ള നീക്കത്തെ ചില ബിജെപി നേതാക്കള്‍ തുരങ്കംവക്കുന്നതായി സേനാ നേതാക്കള്‍ ആരോപിച്ചിരുന്നു.