എന്‍റോണ്‍ ഇന്ത്യ വിടുന്നു

മുംബൈ: അമേരിക്കയിലെ എന്‍റോണ്‍ കമ്പനി ഇന്ത്യ വിടാന്‍ തീരുമാനിച്ചു. മുംബൈയിലെ രത്നഗിരിജില്ലയിലെ ധാബോളില്‍ 2184 മെഗാവാട്ടിന്റെ വൈദ്യുതോല്പാദനപ്ലാന്റ് സ്ഥാപിച്ച് ഏഴുവര്‍ഷത്തിനു ശേഷമാണ് ഇന്ത്യയിലെ പ്രവര്‍ത്തനം അവസാനിപ്പിക്കാന്‍ എന്‍റോണ്‍ തീരുമാനിച്ചത്. ഈ പദ്ധതിയുടെ ഒന്നാംഘട്ടം മാത്രമേ പൂര്‍ത്തിയായിട്ടുള്ളൂ.

എന്‍റോണിന്റെ വൈദ്യുതി വാങ്ങാന്‍ മഹാരാഷ്ട്രസര്‍ക്കാര്‍ തയ്യാറില്ലാത്തതിനാലാണ് എന്‍റോണ്‍ ഇന്ത്യവിടുന്നത്. നേരത്തെ നിശ്ചയിച്ച വിലയേക്കാള്‍ പത്ത് ശതമാനം വരെ കുറവിന് വൈദ്യുതിനല്കാന്‍ എന്‍റോണ്‍ തയ്യാറായെങ്കിലും മഹാരാഷ്ട്രസര്‍ക്കാര്‍ പിന്‍വാങ്ങുകയായിരുന്നു. യൂണിറ്റിന് 3.50 രൂപയ്ക്ക് വൈദ്യുതിനല്കാന്‍ എന്‍റോണ്‍ തയ്യാറായിരുന്നു. എന്നാല്‍ മൂന്നു രൂപയ്ക്ക് ഒരു യൂണിറ്റ് എന്ന തോതില്‍ വൈദ്യുതി നല്കണമെന്നാണ് സര്‍ക്കാര്‍ ആവശ്യം.

ധാബോള്‍ വൈദ്യുതോല്പാദനപദ്ധതിയില്‍ 65 ശതമാനം മുതല്‍ മുടക്കിയിരിക്കുന്നത് എന്‍റോണ്‍ ആണ്. ജനറല്‍ ഇലക്ട്രിക്കും മഹാരാഷ്ട്ര സംസ്ഥാന വൈദ്യുതിബോര്‍ഡും ബെക്ടെലും ഈ പദ്ധതിയില്‍ മുതല്‍മുടക്കിയിട്ടുണ്ട്.

കര്‍ണാടക, ദില്ലി, പഞ്ചാബ്, മധ്യപ്രദേശ്, രാജസ്ഥാന്‍, ഹരിയാന എന്നീ സംസ്ഥാനങ്ങള്‍ ധാബോള്‍വൈദ്യുതി വാങ്ങാന്‍ തയ്യാറായിരുന്നു. എന്നാല്‍ ഒരു യൂണിറ്റ് വൈദ്യുതിയ്ക്ക് 1.65രൂപ മുതല്‍ 2.50 രൂപ വരെ നല്കാന്‍ മാത്രമേ ഈ സംസ്ഥാനങ്ങള്‍ തയ്യാറുള്ളൂ. എന്നാല്‍ ഈ തുക ഉല്പാദനച്ചെലവിനേക്കാള്‍ കുറഞ്ഞ തുകയാണെന്ന് എന്‍റോണ്‍ പറയുന്നു.

ഞങ്ങളുടെ ഫാക്ടറിയുടെ സമീപത്തുള്ള ഗ്രാമങ്ങളിലെ മനുഷ്യരുടെ ജീവിതനിലവാരം ഉയര്‍ത്താന്‍ കഴിഞ്ഞതില്‍ സന്തോഷമുണ്ട്- എന്‍റോണ്‍ കമ്പനിയുടെ മാനേജിംഗ് ഡയറക്ടര്‍ കെ. വാഡെ ക്ലിനെ പറഞ്ഞു. ധാബോളിനടുത്തുള്ള ഗ്രാമങ്ങളില്‍ റോഡുകള്‍, ആശുപത്രി, വിദ്യാഭ്യാസ സ്ഥാപനങ്ങള്‍, ജലവിതരണസംവിധാനം എന്നിവ സ്ഥാപിക്കുന്നതില്‍ എന്‍റോണ്‍ കമ്പനി വിജയിച്ചുവെന്നും അദ്ദേഹം പറഞ്ഞു.