ചെന്നൈ വെടിവെപ്പ്: പാര്‍ലമെന്റ് പിരിഞ്ഞു

ദില്ലി: തമിഴ്നാട്ടില്‍ രാഷ്ട്രപതിഭരണം ഏര്‍പ്പെടുത്തണമെന്നാവശ്യപ്പെട്ട് ഡിഎംകെ പ്രവര്‍ത്തകര്‍ ബഹളമുണ്ടാക്കിയതിനെത്തുടര്‍ന്ന് പാര്‍ലമെന്റിന്റെ ഇരുസഭകളും ആഗസ്ത് 13 തിങ്കളാഴ്ച യോഗം നിര്‍ത്തിവച്ചു. ലോക്സഭ ഉച്ചയ്ക്ക് രണ്ട് മണിവരെയും രാജ്യസഭ ഉച്ചയ്ക്ക് 12 മണിവരെയുമാണ് യോഗം പിരിഞ്ഞത്.

ഞായറാഴ്ച ചെന്നൈയില്‍ ഡിഎംകെ പ്രവര്‍ത്തകര്‍ നടത്തിയ റാലിക്കിടയില്‍ നടന്ന പൊലീസ് വെടിവയ്പില്‍ അഞ്ച് പേര്‍ മരിച്ചിരുന്നു. ഇതില്‍ പ്രതിഷേധിച്ചാണ് ഡിഎംകെ പ്രവര്‍ത്തകര്‍ ലോക്സഭയില്‍ ബഹളം വച്ചത്.

ലോക്സഭ യോഗം തുടങ്ങിയപ്പോള്‍ത്തന്നെ ഡിഎംകെ അംഗം വി. വെറ്റിശെല്‍വം ഷര്‍ട്ടൂരി വലിച്ചെറിഞ്ഞ് തനിക്കേറ്റ പരിക്ക് അംഗങ്ങളെ കാണിച്ചുകൊണ്ട് മുന്നോട്ടുവന്നു. ജയലളിത സര്‍ക്കാരിനെ പിരിച്ചുവിടണമെന്ന് അദ്ദേഹം ആവശ്യപ്പെട്ടു. ഡിഎംകെ പ്രവര്‍ത്തകര്‍ക്കെതിരെ മുദ്രാവാക്യവുമായി എഐഎഡിഎംകെ പ്രവര്‍ത്തകരും മുന്നിട്ടിറങ്ങിയതോടെ സഭ ബഹളമായമായി.

രാജ്യസഭയിലും യോഗം തുടങ്ങിയപ്പോള്‍ ഡിഎംകെ പ്രവര്‍ത്തകര്‍ ബഹളമുണ്ടാക്കാന്‍ തുടങ്ങി. ചെയര്‍മാന്‍ കൃഷന്‍ കാന്തിന്റെ നിരന്തരമായ അഭ്യര്‍ത്ഥനകള്‍ ഫലവത്താകാഞ്ഞതിനെത്തുടര്‍ന്ന് യോഗം 12 മണിവരെ പിരിഞ്ഞു.