ചെന്നൈ വെടിവെപ്പ്: പാര്‍ലമെന്റ് ഇന്നും പിരിഞ്ഞു

ദില്ലി: ചെന്നൈയില്‍ നടന്ന പൊലീസ് വെടിവെപ്പില്‍ പ്രതിഷേധിച്ച് ഡിഎംകെ അംഗങ്ങള്‍ ബഹളം വച്ചതിനെത്തുടര്‍ന്ന് പാര്‍ലമെന്റിന്റെ ഇരുസഭകളും ആഗസ്ത് 14 ചൊവാഴ്ചയും സ്തംഭിച്ചു.

ബഹളത്തെത്തുടര്‍ന്ന് രാജ്യസഭ ദിവസത്തെ യോഗം പിരിഞ്ഞു. ലോക്സഭ ഉച്ചയ്ക്ക് 12 മണിവരെയാണ് പിരിഞ്ഞത്. ആഗസ്ത് 12 ഞായറാഴ്ച ചെന്നൈയില്‍ ഡിഎംകെ നടത്തിയ റാലിക്കുനേരെ പൊലീസ് വെടിവച്ചതില്‍ അന്വേഷണമാവശ്യപ്പെട്ടാണ് സഭയില്‍ ബഹളമുണ്ടായത്. സംഭവത്തില്‍ അഞ്ചു പേര്‍ മരിച്ചിരുന്നു. സംഭവത്തെത്തുടര്‍ന്ന് തുടര്‍ച്ചയായ രണ്ടാമത്തെ ദിവസമാണ് പാര്‍ലമെന്റ് നടപടികളിലേക്ക് കടക്കാതെ യോഗം പിരിയുന്നത്.

രണ്ട് പ്രധാനപ്പെട്ട ആവശ്യങ്ങളാണ് ഡിഎംകെ അംഗങ്ങള്‍ പാര്‍ലമെന്റിനകത്തും പുറത്തും ആവശ്യപ്പെട്ടത്. റാലിക്കു നേരെ നടന്ന പൊലീസ് വെടിവെപ്പിനെക്കുറിച്ച് കേന്ദ്ര കമ്മീഷന്‍ അന്വേഷിക്കണമെന്നതാണ് അതില്‍ ഒന്നാമത്തേത്. കഴിഞ്ഞ ജൂണില്‍ തമിഴ്നാട് മുന്‍ മുഖ്യമന്ത്രി എം. കരുണാനിധിയെയും രണ്ട് കേന്ദ്രമന്ത്രിമാരെയും അറസ്റു ചെയ്ത മൂന്നു പൊലീസ് ഉദ്യോഗസ്ഥരെ സ്ഥലം മാറ്റണമെന്നതാണ് രണ്ടാമത്തെ ആവശ്യം.