എന്‍ആര്‍ഐ സഹകരണസൊസൈറ്റിയുണ്ടാക്കും

കൊച്ചി: വിദേശമലയാളികളുടെ ക്ഷേമത്തിനും നിക്ഷേപ സമാഹരണത്തിനും സഹകരണമേഖലയില്‍ ഒരു എന്‍ആര്‍ഐ സൊസൈറ്റി രൂപീകരിക്കുമെന്ന് സഹകരണമന്ത്രി എം.വി. രാഘവന്‍ പറഞ്ഞു. ആഗസ്ത് 20 തിങ്കളാഴ്ച സമവായം 2001നോടനുബന്ധിച്ച് ക്ഷേമസമ്മേളനം ഉദ്ഘാടനം ചെയ്യുകയായിരുന്നു മന്ത്രി.

സൊസൈറ്റി വിദേശമലയാളികളുടെ ചെറുനിക്ഷേപങ്ങള്‍ സ്വീകരിക്കും. തൊഴില്‍ നഷ്ടപ്പെട്ട് മടങ്ങിയെത്തുന്ന വിദേശമലയാളിയെ പുനരധിവസിപ്പിക്കാനുള്ള നടപടി കൈക്കൊള്ളും. കേരളത്തിലേക്ക് കൂടുതല്‍ നിക്ഷേപകരെ ആകര്‍ഷിച്ചെങ്കിലേ പിടിച്ചുനില്ക്കാന്‍ കഴിയൂ എന്നും മന്ത്രി പറഞ്ഞു.

സംസ്ഥാനത്തിന്റെ സമഗ്രവികസനത്തിന് തുറമുഖങ്ങള്‍ വികസിപ്പിക്കണം. പ്രധാനവ്യവസായസംരംഭകര്‍ക്ക് ഇത് സഹായകരമാവുമെന്നും മന്ത്രി പറഞ്ഞു. കേരളത്തിന്റെ സമ്പദ്ഘടന നിലനിര്‍ത്തുന്നതിന് വിദേശമലയാളികള്‍ വലിയ സംഭാവനകള്‍ നല്കുന്നുണ്ടെന്നും അദ്ദേഹം പറഞ്ഞു.