ഹുറിയത്ത് നേതാക്കളെ തടയണം: ബിജെപി
തിരുവനന്തപുരം: സപ്തംബര് രണ്ട്, മൂന്ന് തീയതികളില് കേരളം സന്ദര്ശിക്കുന്ന ഹുറിയത്ത് നേതാക്കളെ സംസ്ഥാന സര്ക്കാര് തടയണമെന്ന് ബിജെപി സംസ്ഥാന പ്രസിഡണ്ട് സി.കെ. പത്മനാഭന് ആവശ്യപ്പെട്ടു.
ആഗസ്ത് 21 ചൊവാഴ്ച തിരുവനന്തപുരത്ത് നടന്ന ബിജെപി സംസ്ഥാന നേതൃയോഗം ഉദ്ഘാടനം ചെയ്യുകയായിരുന്നു അദ്ദേഹം. സംസ്ഥാനത്തെ യുഡിഎഫ് സര്ക്കാര് രാജ്യദ്രോഹപരവും ജനദ്രോഹപരവുമായ നടപടികളാണ് കൈക്കൊള്ളുന്നതെന്ന് അദ്ദേഹം ആരോപിച്ചു. വയനാട്ടില് പട്ടിണി മരണം കൂടുകയാണെങ്കിലും സര്ക്കാര് ഇക്കാര്യത്തില് കാര്യമായ നടപടികളൊന്നും കൈക്കൊണ്ടിട്ടില്ല.
അതേസമയം സംസ്ഥാന സന്ദര്ശിക്കുന്ന ഹുറിയത്ത് നേതാക്കളെ തടയാന് ആര്എസ്എസും സംഘ്പരിവാറും തീരുമാനിച്ചു. സന്ദര്ശനത്തില് പ്രതിഷേധിക്കാന് ഈ സംഘടനകള് ഉള്പ്പെട്ട ദേശസുരക്ഷാവേദി ആഗസ്ത് 24 വെള്ളിയാഴംച ജില്ലാതലത്തില് പ്രതിഷേധ റാലി നടത്തും.
ഹുറിയത്ത് നേതാക്കള്ക്ക് ദേശീയ വിരുദ്ധ പ്രചാരണം നടത്താന് അനുമതി നല്കുകയാണ് സംസ്ഥാന സര്ക്കാര് എന്ന് സംഘടനാ നേതാക്കള് ആരോപിക്കുന്നു. ഹുറിയത്തുകാരെ കേരളമണ്ണില് കാലുകുത്താന് ഞങ്ങള് സമ്മതിക്കില്ല. അവര്ക്ക് വിമാനമിറങ്ങാന് പറ്റാത്ത സാഹചര്യം ഉണ്ടാക്കേണ്ടി വന്നാല് ഞങ്ങള് അതും ചെയ്യും - നേതാക്കള് മുന്നറിയിപ്പു നല്കി.