കടലുണ്ടി: ജുഡീഷ്യല്‍ അന്വേഷണത്തിന് ഹര്‍ജി

കൊച്ചി: 52 പേരുടെ മരണത്തിന് ഇടയാക്കിയ കടലുണ്ടി തീവണ്ടി അപകടത്തെക്കുറിച്ച് ജുഡീഷ്യല്‍ അന്വേഷണമാവശ്യപ്പെട്ടു കൊണ്ടുള്ള ഹര്‍ജി കേരള ഹൈക്കോടതി ഫയലില്‍ സ്വീകരിച്ചു. വിമുക്തഭടനായ കോഴിക്കോട് സ്വദേശി ഉണ്ണിക്കൃഷ്ണന്‍ നായരാണ് ഹര്‍ജി നല്‍കിയത്.

ഹര്‍ജിയെത്തുടര്‍ന്ന് കേന്ദ്രസര്‍ക്കാരിനും ദക്ഷിണ റെയില്‍വെയ്ക്കും റെയില്‍വെ ബോര്‍ഡിനും നോട്ടീസയക്കാന്‍ ജസ്റിസ് ജെ.ബി. കോശി ഉത്തരവിട്ടു.

അപകടം നടന്ന തീവണ്ടിയിലെ യാത്രക്കാരനായിരുന്നു ഉണ്ണിക്കൃഷ്ണന്‍ നായര്‍. യാത്രയ്ക്കിടയില്‍ തീവണ്ടി കുലുങ്ങുന്നതായി അനുഭവപ്പെട്ട താന്‍ അക്കാര്യം ബന്ധപ്പെട്ട ഉദ്യോഗസ്ഥരെ അറിയിച്ചെങ്കിലും അധികൃതര്‍ നടപടിയൊന്നും കൈക്കൊണ്ടില്ല എന്ന് ഹര്‍ജിയില്‍ പറയുന്നു.

കഴിഞ്ഞ ജൂണ്‍ 22നാണ് തീവണ്ടി അപകടം നടന്നത്. മംഗലാപുരം - ചെന്നൈ മെയിലാണ് കടലുണ്ടി പാലത്തില്‍വച്ച് പാളം തെറ്റി പുഴയിലേക്ക് മറിഞ്ഞത്. തീവണ്ടിയുടെ മൂന്ന് ബോഗികളാണ് പുഴയിലേക്ക് മറിഞ്ഞത്.