തെഹല്ക സംഘത്തിനെതിരെ നടപടി വേണം
ദില്ലി: സൈനിക ഉദ്യോഗസ്ഥരില് നിന്നും പ്രതിരോധ ഇടപാട് രഹസ്യങ്ങള് ചോര്ത്താന് തെഹല്ക സംഘം ലൈംഗികതൊഴിലാളികളെ ഉപയോഗിച്ചിട്ടുണ്ടോയെന്ന് ആഭ്യന്തരമന്ത്രാലയം അന്വേഷിക്കണമെന്ന് കേന്ദ്ര പാര്ലമെന്റികാര്യമന്ത്രി പ്രമോദ് മഹാജന് ലോക്സഭയില് പറഞ്ഞു. നിയമം ലംഘിച്ചിട്ടുണ്ടെന്ന് വ്യക്തമാവുകയാണെങ്കില് ഇവര്ക്കെതിരെ ശക്തമായ നടപടികള് സ്വീകരിക്കണമെന്നും മഹാജന് ആവശ്യപ്പെട്ടു.
ആഗസ്ത് 23 വ്യാഴാഴ്ച തെഹല്ക വിവാദത്തെ കുറിച്ച് സഭയില് നടന്ന ചര്ച്ചയോട് പ്രതികരിക്കുകയായിരുന്നു മഹാജന്. അന്വേഷണാത്മക മാധ്യമപ്രവര്ത്തനത്തിനായി സദാചാര വിരുദ്ധമായ മാര്ഗങ്ങള് ഉപയോഗിക്കുന്നതിനെ ഒരു തരത്തിലും ന്യായീകരിക്കാനാവില്ല.
വാര്ത്ത ശേഖരിക്കാന് രാജ്യത്തെ മാധ്യമപ്രവര്ത്തകര്ക്ക് അവകാശമുണ്ട്. പക്ഷേ അന്വേഷണാത്മക മാധ്യമപ്രവര്ത്തനത്തിന്റെ പേരില് വാര്ത്ത ശേഖരിക്കാന് എന്തു മാര്ഗമാണ് സ്വീകരിക്കുന്നതെന്ന് പരിശോധിക്കേണ്ടതുണ്ടെന്ന് മഹാജന് പറഞ്ഞു.