മലപ്പുറത്ത് എട്ട് മെഡിക്കല്‍ കോളേജുകള്‍

തിരുവനന്തപുരം: സംസ്ഥാനത്ത് സ്വകാര്യമേഖലയില്‍ സ്വാശ്രയ അടിസ്ഥാനത്തില്‍ ആകെ 48 മെഡിക്കല്‍ കോളേജുകള്‍ തുടങ്ങാന്‍ സര്‍ക്കാര്‍ അനുമതി നല്‍കി.

ഇതില്‍ഏറ്റവും കൂടുതല്‍ മലപ്പുറം ജില്ലയിലാണ്. ജില്ലയില്‍ എട്ട് മെഡിക്കല്‍ കോളേജുകള്‍ തുടങ്ങാനാണ് സര്‍ക്കാര്‍ അനുമതി നല്‍കിയിട്ടുള്ളത്.

മൂന്ന് പ്രവാസി സംഘടനകള്‍ക്കും എന്‍എസ്എസിനും എസ്എന്‍ ട്രസ്റ്റിനും ഓരോ മെഡിക്കല്‍ കോളേജുകള്‍ അനുവദിച്ചിട്ടുണ്ട്.

തിരുവനന്തപുരത്ത് തൈക്കാടുള്ള ഫൗണ്ടേഷന്‍ ഓഫ് എന്‍ആര്‍ഐ, തിരുവനന്തപുരം യൂണിവേഴ്സല്‍ ബില്‍ഡിംഗിലുള്ള കേരളാ എന്‍ആര്‍ഐ ഫൗണ്ടേഷന്‍, കൊല്ലത്തുള്ള കേരളാ എന്‍ആര്‍ഐ എജ്യുക്കേഷണല്‍ ട്രസ്റ് എന്നിവര്‍ക്ക് അതാത് ജില്ലകളിലാണ് മെഡിക്കല്‍ കോളേജ് തുടങ്ങാനുള്ള അനുമതി നല്‍കിയിട്ടുള്ളത്.

വ്യാപാരി വ്യവസായി ഏകോപനസമിതിക്ക് കോഴിക്കോട്ട് കോളേജ് തുടങ്ങാനുള്ള അനുമതി ലഭിച്ചു. എന്‍എസ്എസിന് പത്തനംതിട്ടയിലും എസ്എന്‍ ട്രസ്റിന് കൊല്ലത്തും മെഡിക്കല്‍ കോളേജുകള്‍ തുടങ്ങാനുള്ള അനുമതി ലഭിച്ചു.

ഓരോ ജില്ലകളിലും അനുവദിക്കപ്പെട്ട മെഡിക്കല്‍ കോളേജുകളുടെ എണ്ണം:

ഇടുക്കി, പത്തനംതിട്ട- മൂന്ന്,

തൃശൂര്‍, തിരുവനന്തപുരം, കോഴിക്കോട്- അഞ്ച്,

എറണാകുളം- ആറ്,

കാസര്‍ഗോഡ്, കൊല്ലം, ആലപ്പുഴ- രണ്ട്,

പാലക്കാട്- നാല്,

കോട്ടയം-ഒന്ന്

ജില്ല ഏതെന്ന് വ്യക്തമാക്കാത്ത ഒരു അപേക്ഷകനും മെഡിക്കല്‍ കോളേജ് തുടങ്ങാനുള്ള അനുമതി നല്‍കിയിട്ടുണ്ട്.

മെഡിക്കല്‍ കോളേജുകള്‍ തുടങ്ങാനുള്ളസമ്മത പത്രം- എന്‍ഒസി (നോണ്‍ ഒബ്ജക്ഷന്‍ സര്‍ട്ടിഫിക്കറ്റ്) ആഗസ്ത് 23 വ്യാഴാഴ്ച മുഖ്യമന്ത്രി എ. കെ. ആന്റണി വിതരണം ചെയ്തു. അഴിമതി ഇല്ലാതാക്കാനും ഇടത്തട്ടുകാരെ ഒഴിവാക്കാനുമാണ് അപേക്ഷകര്‍ക്കെല്ലാം എന്‍ഒസി നല്‍കിയതെന്ന് മുഖ്യമന്ത്രി വ്യക്തമാക്കി. ആരോഗ്യമന്ത്രി പി. ശങ്കരന്‍ അധ്യക്ഷനായിരുന്നു.