മുന് എംഎല്എയും കുടുംബവും കൊല്ലപ്പെട്ടു
ചണ്ഡീഗഢ്: ഹരിയാനയില് മുന്എംഎല്എയെയും കുടുംബത്തിലെ മറ്റ് ആറ് പേരെയും ആഗസ്ത് 23 വ്യാഴാഴ്ച രാത്രി കൂട്ടക്കൊല ചെയ്തു. ഹിസാറിലെ ലിതാനി ജില്ലയിലെ ഫാം ഹൗസിലാണ് കൂട്ടക്കൊല നടന്നത്.
മുന് എംഎല്എ റെലും രാം പുനിയയും അദ്ദേഹത്തിന്റെ ഭാര്യ കൃഷ്ണയും മകള് പ്രിയങ്കയും മകന് സുനിലും ഭാര്യയും അവരുടെ മൂന്ന് കുട്ടികളുമാണ് കൊല്ലപ്പെട്ടത്. പുനിയയുടെ ഒരു മകളെ ഗുരുതരാവസ്ഥയില് ആശുപത്രിയില് പ്രവേശിപ്പിച്ചു.
കൊലയാളികളെ കുറിച്ച് വിവരമൊന്നും ലഭിച്ചിട്ടില്ലെന്ന് പൊലീസ് പറഞ്ഞു.
ഇരുമ്പുവടികള് കൊണ്ട് അടിച്ചാണ് എല്ലാവരെയും കൊലപ്പെടുത്തിയത്. കിടക്കയില് കിടക്കുകയായിരുന്ന മൃതദേഹങ്ങള്ക്ക് ചുറ്റും രക്തം തളം കെട്ടികിടന്നിരുന്നു.
വ്യാഴാഴ്ച രാത്രി പുനിയയുടെ ഫാം ഹൗസില് ഒരു ജന്മദിനാഘോഷം നടന്നിരുന്നു. വെള്ളിയാഴ്ച രാവിലെ അയല്വാസികളാണ് കുടുംബാംഗങ്ങളെ മരിച്ച നിലയില് കണ്ടത്.
1996ലാണ് പുനിയ ഹരിയാന നിയമസഭയിലേക്ക് തിരഞ്ഞെടുക്കപ്പെട്ടത്.