വൈദ്യുതി ബോര്ഡ് കമ്പനികളാക്കില്ല: മന്ത്രി
തിരുവനന്തപുരം: കേന്ദ്ര സര്ക്കാരുമായി ഒപ്പിട്ട കരാറിന്റെ അടിസ്ഥാനത്തില് വൈദ്യുതി ബോര്ഡിനെ മൂന്ന് കമ്പനികളാക്കി മാറ്റുമെന്ന ആരോപണം ശരിയല്ലെന്ന് വൈദ്യുത മന്ത്രി കടവൂര് ശിവദാസന്.
ബോര്ഡ് നിലനിര്ത്തിക്കൊണ്ട് തന്നെ മൂന്ന് ലാഭകേന്ദ്രങ്ങള് രൂപീകരിക്കുമെന്നാണ് കരാറില് പറഞ്ഞിട്ടുള്ളതെന്ന് കരാറിനെ കുറിച്ച് ആഗസ്ത് 24 വെള്ളിയാഴ്ച ബോര്ഡ് ഉദ്യോഗസ്ഥരോട് വിശദീകരിക്കവെ മന്ത്രി പറഞ്ഞു. പ്രസരണം, വിതരണം, ഉല്പ്പാദനം എന്നിങ്ങനെ മൂന്ന് ലാഭകേന്ദ്രങ്ങള് വരുമ്പോള് ഒരു തൊഴിലാളിയെ പോലും പിരിച്ചുവിടില്ലെന്നും മന്ത്രി ഉറപ്പു നല്കി.
ബോര്ഡിന്റെ കാര്യക്ഷമത വര്ധിപ്പിക്കുന്നതിലൂടെ 500 കോടി രൂപ ലാഭിക്കാനാകുമെന്ന് മന്ത്രി അറിയിച്ചു. താരിഫ് റെഗുലേറ്ററി കമ്മിഷന് വന്നാലും സര്ക്കാര് നിര്ദേശിച്ചാല് മാത്രമേ കമ്മിഷന് നിരക്ക് വര്ധിപ്പിക്കുകയുള്ളു എന്നും മന്ത്രി വ്യക്തമാക്കി. എല്ലാ വശങ്ങളും പഠിച്ചതിന് ശേഷമായിരിക്കും കമ്മിഷന് നിരക്ക് വര്ധന എത്രയാണെന്ന് നിശ്ചയിക്കുക.
വൈദ്യുതി മോഷണം പോലുള്ള കാര്യങ്ങള് തടയുന്നതില് ബോര്ഡ് ജീവനക്കാര് ഉത്തരവാദിത്തം പുലര്ത്തിയിരുന്നില്ലെന്ന് മന്ത്രി പറഞ്ഞു. കഴിഞ്ഞ കാലത്ത് ബോര്ഡില് നടന്ന ക്രമക്കേടുകളെ കുറിച്ചെല്ലാം അന്വേഷണം നടക്കുന്നുണ്ട്. സത്യസന്ധരായ ഉദ്യോഗസ്ഥര് ഇക്കാര്യത്തില് വിളറിപിടിക്കേണ്ട കാര്യമില്ലെന്നും മന്ത്രി വ്യക്തമാക്കി.