തൃശൂരും പാലക്കാട്ടും ഭൂചലനം

തൃശൂര്‍: തൃശൂര്‍ ജില്ലയിലും പാലക്കാട് ജില്ലയിലും ആഗസ്ത് 25 ശനിയാഴ്ച പുലര്‍ച്ചെ ഭൂചലനം അനുഭവപ്പെട്ടു. ഭൂചലനത്തോടൊപ്പം ചില പ്രദേശങ്ങളില്‍ മുഴക്കവും അനുഭവപ്പെട്ടു.

പാലക്കാട് ജില്ലയിലെ പട്ടാമ്പി, ഷൊര്‍ണൂര്‍ മേഖലകളിലാണ് ഭൂചലനം അനുഭവപ്പെട്ടത്. ഷൊര്‍ണൂര്‍, ദേശമംഗലം, വടക്കാഞ്ചേരി, എരുമപ്പെട്ടി, കടങ്ങോട്, വേലൂര്‍, മുണ്ടത്തിക്കോട്, പന്നിത്തടം, മച്ചാട്, തലക്കോട്ടുകര തുടങ്ങിയ പ്രദേശങ്ങളില്‍ ഭൂചലനം കൂടുതലായി അനുഭവപ്പെട്ടു. ഈ പ്രദേശങ്ങളില്‍ ഇടിനാദം പോലുള്ള ഒരു ശബ്ദവും ഭൂമിക്കടിയില്‍ നിന്നുണ്ടായി.

തൃശൂരില്‍ തലപ്പള്ളി മേഖലയിലാണ് ഭൂചലനമുണ്ടായത്. വടക്കാഞ്ചേരി താലൂക്ക് ഓഫീസില്‍ സ്ഥാപിച്ചിരുന്ന സീസ്മോഗ്രാഫ് തകരാറിലായതിനാല്‍ ഭൂചലനത്തിന്റെ തോത് രേഖപ്പെടുത്താനായില്ല.

പാലക്കാട് ചില പ്രദേശങ്ങളില്‍ ഭൂചലനം മൂലം ചില വീടുകളുടെ ഭിത്തിയില്‍ വിള്ളല്‍ വീണു. ഈ പ്രദേശങ്ങളിലെ ജനങ്ങള്‍ ഭയവിഹ്വലരാണ്.