മഹന്ത രണ്ട് പത്രങ്ങള്‍ക്കെതിരെ കേസ് നല്‍കി

ഗുവാഹതി: തനിക്കെതിരെ അപകീര്‍ത്തിപരമായ ആരോപണങ്ങള്‍ നടത്തിയതിന് അസം ഗണ പരിഷത്ത് നേതാവും അസം മുന്‍മുഖ്യമന്ത്രിയുമായ പ്രഫുല്ല കുമാര്‍ മഹന്ത രണ്ട് പത്രങ്ങള്‍ക്കെതിരെ അഞ്ചു കോടിയുടെ മാനനഷ്ടക്കേസ് ഫയല്‍ ചെയ്തു.

ദൈനിക് അഗ്രദൂത്, അസമിയ പ്രതിദിന്‍ എന്നീ പത്രങ്ങള്‍ക്കെതിരെയാണ് ഗുഹാവതിയിലെ കോടതിയില്‍ കേസ് നല്‍കിയിരിക്കുന്നത്. സംസ്ഥാന സെക്രട്ടറിയേറ്റിലെ ഒരു ജീവനക്കാരിയെ മഹന്ത വിവാഹം കഴിച്ചുവെന്ന വാര്‍ത്ത പ്രസിദ്ധീകരിച്ചതിനാണ് മാനനഷ്ടകേസ് ഫയല്‍ ചെയ്തിരിക്കുന്നത്. വാര്‍ത്ത അടിസ്ഥാന രഹിതവും വാസ്തവവിരുദ്ധവുമാണെന്ന് മഹന്ത പറഞ്ഞു.

നേരത്തെ മഹന്ത തന്നെ വിവാഹം കഴിച്ചുവെന്ന് അവകാശപ്പെടാനായി സംഗമിത്ര ബരാലിയ്ക്ക് സംസ്ഥാനമന്ത്രി ശരത് ബാര്‍കടോകി 15 ലക്ഷം രൂപ നല്‍കിയെന്ന് തെഹല്‍ക.കോം റിപ്പോര്‍ട്ട് ചെയ്തിരുന്നു. ഇത് വാസ്തവവിരുദ്ധമാണെന്ന് വ്യക്തമാക്കിയ സംസ്ഥാന സര്‍ക്കാര്‍ റിപ്പോര്‍ട്ട് പിന്‍വലിച്ച് ക്ഷമാപണം നടത്തിയില്ലെങ്കില്‍ അഞ്ച് കോടിക്ക് മാനനഷ്ടകേസ് ഫയല്‍ ചെയ്യുമെന്ന് അറിയിച്ചിരുന്നു. ഇതേ തുടര്‍ന്ന് തെഹല്‍ക ക്ഷമാപണം നടത്തി.