ഓണാഘോഷത്തിന് പൊലിമ കുറയും

തിരുവനന്തപുരം: സംസ്ഥാന സര്‍ക്കാരിന്റെ സാമ്പത്തിക വൈഷമ്യം മൂലം ഇക്കുറി ഓണാഘോഷത്തിന് പൊലിമ കുറയും.

ഓണാഘോഷത്തിന് കഴിഞ്ഞ വര്‍ഷം അനുവദിച്ച തുകയെക്കാള്‍ വളരെ കുറഞ്ഞ തുകയാണ് ഇക്കുറി അനുവദിച്ചിട്ടുള്ളത്. ഇക്കുറി 21 ലക്ഷം രൂപയാണ് സര്‍ക്കാര്‍ അനുവദിച്ചിട്ടുള്ളത്. കഴിഞ്ഞ തവണ ഇത് 48. 55 ലക്ഷം രൂപയായിരുന്നു.

ഓണാഘോഷത്തോടനുബന്ധിച്ചുള്ള വിനോദസഞ്ചാര വാരാഘോഷം പ്രധാനമായും നടക്കുന്ന തിരുവനന്തപുരം ജില്ലയ്ക്ക് ഇത്തവണ 13 ലക്ഷം രൂപയാണ് അനുവദിച്ചത്. കഴിഞ്ഞ തവണ ഇത് 39. 75 ലക്ഷം രൂപയായിരുന്നു.

എറണാകുളം, തൃശൂര്‍, കോഴിക്കോട് ജില്ലകള്‍ക്ക് ഇക്കുറി ഒരു ലക്ഷം രൂപ വീതം അനുവദിച്ചിട്ടുണ്ട്. കഴിഞ്ഞ വര്‍ഷം 1.1 ലക്ഷം രൂപയായിരുന്നു ഈ ജില്ലകള്‍ക്ക് ഓണാഘോഷ ചെലവുകള്‍ക്കായി നല്‍കിയത്. മറ്റ് ജില്ലകള്‍ക്ക് കഴിഞ്ഞ തവണത്തെ പോലെ തന്നെ ഇക്കുറിയും 50, 000 ര ൂപ വീതം അനുവദിച്ചിട്ടുണ്ട്.

1999ല്‍ 44 ലക്ഷം രൂപയായിരുന്നു ഓണാഘോഷത്തിന് അനുവദിച്ചത്. 1999ല്‍ 40 ലക്ഷം രൂപയാണ് അനുവദിച്ചത്. തിരുവനന്തപുരം നഗരത്തില്‍ വിനോദസഞ്ചാര വാരാഘോഷത്തിന് സമാപനം കുറിച്ചുകൊണ്ട് നടത്തുന്ന ഘോഷയാത്രയ്ക്കുള്ള വിഹിതവും കുറച്ചിട്ടുണ്ട്. ഘോഷയാത്രയ്ക്ക് മൂന്ന് ലക്ഷം രൂപ മാത്രമാണ് അനുവദിച്ചിട്ടുള്ളത്. കഴിഞ്ഞ വര്‍ഷം അഞ്ച് ലക്ഷം രൂപയും 1999ല്‍ 4. 79 ലക്ഷം രൂപയും ഘോഷയാത്രയ്ക്കായി അനുവദിച്ചിരുന്നു.