കക്കാട് ടണലില് ചോര്ച്ച; ഉത്പാദനം നിര്ത്തി
പത്തനംതിട്ട: കക്കാട് വൈദ്യുതപദ്ധതിയുടെ ടണല് ചോര്ന്നതിനെ തുടര്ന്ന് വൈദ്യുതി ഉത്പാദനം നിര്ത്തിവെച്ചു. നിര്മാണത്തിലുണ്ടായ തകരാറാണ് ചോര്ച്ചയ്ക്ക് കാരണമായതെന്ന് ചൂണ്ടിക്കാണിക്കപ്പെടുന്നു.
വൈദ്യുതി ഉത്പാദനം നിറുത്തിയതുകൊണ്ട് 50 മെഗാവാട്ട് വൈദ്യുതിയുടെ കുറവ് കേരളത്തില് അനുഭവപ്പെടും.
പത്തനംതിട്ട ജില്ലയിലെ സീതത്തോടിനടുത്താണ് കക്കാട് പദ്ധതി.
ആഗസ്ത് 28 ചൊവാഴ്ച രണ്ട് മണിയോടെ നാട്ടുകാരാണ് വിള്ളലിലൂടെ വെള്ളം ഒഴുകിവരുന്നത് കണ്ടെത്തിയത്. വിവരമറിഞ്ഞതിനെ തുടര്ന്ന് ജില്ലാ കളക്ടര് പി.എസ്.ഈനോസും വൈദ്യുതി ഉദ്യോഗസ്ഥരും സ്ഥലത്തെത്തി. വിള്ളല് പരിശോധിച്ച സംഘം ഉത്പാദനം നിര്ത്തിവെക്കാന് തീരുമാനിച്ചു. മൂഴിയാറില് നിന്ന് ഉത്പാദനത്തിന് ശേഷം വരുന്ന വെള്ളം ടണലിലൂടെ വിടാതെ മാറ്റിയൊഴുക്കിവിട്ടു.
ടണലിനടുത്ത് ചോര്ച്ച കണ്ട ഭാഗത്തിന് താഴെയായി താമസിക്കുന്ന അഞ്ച് കുടുംബങ്ങളെ മാറ്റിപ്പാര്പ്പിച്ചു.
50 മെഗാവാട്ട് വൈദ്യുതി ഉത്പാദിപ്പിക്കുന്ന വൈദ്യുത പദ്ധതിയുടെ ഒരു ജനറേറ്റര് കഴിഞ്ഞ വര്ഷം കത്തിപ്പോയിരുന്നു. 25 മെഗാവാട്ട് വൈദ്യുതിയാണ് ഇവിടെ ഇപ്പോള് ഉത്പാദിപ്പിക്കുന്നത്.