ഭര്‍ത്താവിനെ മര്‍ദ്ദിച്ച യുവതിയെ തിരയുന്നു

തിരുവനന്തപുരം: ഭര്‍ത്താവിനെ വടി കൊണ്ട് തല്ലിച്ചതച്ച യുവതിയെ പൊലീസ് തിരയുന്നു.

ബിരുദാനന്തര ബിരുദധാരിയായ മിനി (26) ആണ് സ്വന്തം ഭര്‍ത്താവിനെ മര്‍ദ്ദിച്ചതായി പൊലീസിന് പരാതി ലഭിച്ചത്. കിളിമാനൂര്‍ പൊലീസ് അന്വേഷണമാരംഭിച്ചിട്ടുണ്ടെങ്കിലും മിനി ഒളിവിലാണ്.

ഏഴു മാസമായി അകന്നുകഴിയുന്ന ഭര്‍ത്താവ് സുരേഷിനെ കഴിഞ്ഞ ദിവസം നിരവധി പേര്‍ നോക്കിനില്‍ക്കെ മിനി മര്‍ദ്ദിച്ചതായാണ് സുരേഷിന്റെ ബന്ധുക്കള്‍ പരാതി നല്‍കിയിരിക്കുന്നത്. ലോറി ഡ്രൈവറായ സുരേഷ് പാങ്ങാത്തടം എന്ന സ്ഥലത്ത് വച്ച് ലോറിയില്‍ നിന്നും സാധനം ഇറക്കുവാന്‍ സഹായിക്കുമ്പോഴാണ് മിനി വടി കൊണ്ട് തല്ലിയതെന്ന് പറയപ്പെടുന്നു. ഭര്‍ത്താവും ഭാര്യയും തമ്മിലുള്ള തര്‍ക്കമായതിനാല്‍ നാട്ടുകാര്‍ ഇടപെട്ടില്ല. പൊതുനിരത്തില്‍ വച്ച് അപ്രതീക്ഷിതമായി ഭാര്യയില്‍ നിന്നും തല്ല് കിട്ടിയതിനാല്‍ സുരേഷ് സ്തബ്ധനായി നില്‍ക്കുകയായിരുന്നു.

തനിക്കും ഒരു വയസ് പ്രായമുള്ള കുഞ്ഞിനും ചെലവിന് നല്‍കണമെന്നാവശ്യപ്പെട്ട് മിനി നിരന്തരം സുരേഷിനെ ശല്യം ചെയ്യാറുണ്ടായിരുന്നു. ഇവര്‍ വിവാഹിതരായിട്ട് രണ്ട് വര്‍ഷം കഴിഞ്ഞു.