ഫൈനല് വില്യംസ് സഹോദരിമാര് തമ്മില്
ന്യൂയോര്ക്ക്: ന്യൂയോര്ക്കിലെ ആര്തര് ആഷെ സ്റേഡിയത്തില് ഒരു ചരിത്ര മത്സരം നടക്കും. ടെന്നീസിലെ കറുത്ത മുത്തുകളായ സഹോദരിമാര് തമ്മില്. 2001ലെ യുഎസ് ഓപ്പണ് വനിതാ ചാമ്പ്യനാരെന്നറിയാന് സപ്തംബര് ഒമ്പത് ഞായറാഴ്ച പുലര്ച്ചെ 5.30ന് ഈ സഹോദരിമാര് തമ്മില് ഏറ്റുമുട്ടും.
വീനസ് വില്യംസ് നിലവിലെ ചാമ്പ്യനാണ്. 1999ല് സെറീന നേടിയ കിരീടം കഴിഞ്ഞ വര്ഷം വീനസ് തങ്ങളുടെ കുടുംബത്തിലേക്കു തന്നെ കൊണ്ടുവരികയായിരുന്നു. ഒരു ഗ്രാന്റ് സ്ലാം ഫൈനലിലും ഈ സഹോദരിമാര് തമ്മില് ഏറ്റുമുട്ടിയിട്ടില്ലാത്തതിനാല് മത്സരം ചരിത്രത്തില് രേഖപ്പെടുത്തുമെന്ന് തീര്ച്ച.
സപ്തംബര് ഏഴ് വെള്ളിയാഴ്ച രാത്രി നടന്ന സെമിഫൈനലുകളില് ആധികാരിക ജയം സ്വന്തമാക്കിയാണ് ഇരുവരും ഫൈനലിലെത്തിയത്. സെറീനയുടേതായിരുന്നു ആദ്യ ഊഴം. ലോക ഒന്നാം നമ്പറും ഒന്നാം സീഡുമായ സ്വിറ്റ്സര്ലാണ്ടിന്റെ മാര്ട്ടിന ഹിംഗിസിനെ നിലയുറപ്പിക്കുന്നതിനു മുമ്പ് 6-3, 6-2നാണ് സെറീന തകര്ത്തത്. അതും വെറും 51 മിനിറ്റിനുള്ളില്. കോര്ട്ടിന്റെ വിവിധ ഭാഗങ്ങളിലേക്ക് കുതിച്ചു പാഞ്ഞ സെറീനയുടെ പന്തുകളെ പലപ്പോഴും ഹിംഗിസിന് തൊടാന് പോലും കിട്ടിയില്ല.
വീനസും തീരെ പിന്നിലായിരുന്നില്ല. ലോക രണ്ടാം നമ്പറും രണ്ടാം സീഡുമായ അമേരിക്കയുടെ ജെന്നിഫര് കപ്രിയാറ്റിയെയാണ് വീനസ് തകര്ത്തു വിട്ടത്. സ്കോര്: 6-4, 6-2. മത്സരം ഒരു മണിക്കൂറും 22 മിനിറ്റും നീണ്ടു.
പുരുഷവിഭാഗം സെമി ഇന്ന്
വനിതാ വിഭാഗം ഫൈനലിനു തൊട്ടുമുമ്പ് സപ്തംബര് എട്ട് ശനിയാഴ്ച പുരുഷവിാഗം സെമിഫൈനലുകള് നടക്കും. ആദ്യസെമിയില് നാലാം സീഡ് ആസ്ത്രേലിയയുടെ ലെയ്ട്ടണ് ഹെവിറ്റ് ഏഴാം സീഡ് റഷ്യയുടെ യെവ്ജനി കഫല്നിക്കഫിനെ നേരിടും. നിലവിലുള്ള ചാമ്പ്യനും മൂന്നാം സീഡുമായ റഷ്യയുടെ മരാത് സഫിനും 10ാം സീഡ് അമേരിക്കയുടെ പീറ്റ് സാംപ്രാസും തമ്മിലാണ് രണ്ടാം സെമി.