എഫ്ബിഐ 2 ഇന്ത്യക്കാരെ ചോദ്യം ചെയ്യുന്നു
ഹൈദരാബാദ്: സപ്തംബര് 11 ചൊവാഴ്ച അമേരിക്കയില് നടന്ന തീവ്രവാദ ആക്രമണവുമായി ബന്ധപ്പെട്ട് എഫ്ബിഐ രണ്ട് ഇന്ത്യക്കാരെ ചോദ്യം ചെയ്തുവരുന്നു. ഹൈദരാബാദ് സ്വദേശികളെന്ന് സംശയിക്കുന്ന മൊഹമ്മദ് ജാവീദ് അസ്മത്ത്, അയൂബ് അലി ഖാന് എന്നിവരെയാണ് ചോദ്യം ചെയ്യുന്നത്.
ദുധ് ബൗളിയിലെ നിവാസികളാണ് ഇവര് എന്നു കരുതുന്നു. ഇവിടെയുളള അസ്മത്ത്, ഖാന് കുടുംബങ്ങള് സംസ്ഥാന സര്ക്കാര് രൂപീകരിച്ച ഹെല്പ്ലൈനുമായി നേരത്തെ ബന്ധപ്പെട്ടിരുന്നു. രണ്ടു പേരുടെ പേരും വയസ്സും മേല്വിലാസവും ഇവര് അധികൃതര്ക്കു നല്കി. അസ്മത്തും ഖാനും നൂജഴ്സിയില് നിന്ന് ടെക്സാസിലേക്ക് വിമാനം വഴി വരാനാണ് പോകാന് ഉദ്ദേശിച്ചിരുന്നതെന്നും എന്നാല് തീവ്രവാദ ആക്രമണത്തെത്തുടര്ന്ന് തീവണ്ടിയില് പോവുകയായിരുന്നുവെന്നും കുടുംബങ്ങള് പറയുന്നു.
ടെക്സാസിലെ ഫോര്ട്ട് വര്ത്ത് റെയില്വെ സ്റേഷനില് വച്ചാണ് ഇവര് പിടിയിലായത്. സപ്തംബര് 16 ഞായറാഴ്ച ഇവരെ ന്യൂയോര്ക്കിലേക്ക് ചോദ്യം ചെയ്യാനായി കൊണ്ടുപോയി. തങ്ങള് ഇന്ത്യക്കാരാണെന്ന് അവര് പൊലീസിനോട് പറഞ്ഞു. എന്നാല് അത് തെളിയിക്കാന് അവരുടെ പക്കല് തെളിവുകളൊന്നുമില്ലെന്നാണ് ടെക്സാസ് പൊലീസ് പറയുന്നത്.