തീവ്രവാദി വിരുദ്ധ പ്രമേയം യുഎന്‍ കൗണ്‍സില്‍ അംഗീകരിച്ചു

യുണൈറ്റഡ് നാഷന്‍സ്: ആഗോള തീവ്രവാദത്തെ ഇല്ലാതാക്കുന്നതിനായി അമേരിക്ക അവതരിപ്പിച്ച പ്രമേയം ഐക്യരാഷ്ട്ര സഭാ സുരക്ഷാ കൗണ്‍സില്‍ ഏകകണ്ഠമായി അംഗീകരിച്ചു. തീവ്രവാദത്തിന് സാമ്പത്തികമായും ആശയപരമായും പിന്തുണ നല്‍കുന്ന കേന്ദ്രങ്ങളെ ഇല്ലാതാക്കണമെന്ന് എല്ലാ അംഗരാഷ്ട്രങ്ങളോടും പ്രമേയം ആവശ്യപ്പെടുന്നു.

ന്യൂയോര്‍ക്കിലും വാഷിംഗ്ടണിലും നടന്ന തീവ്രവാദ ആക്രമണങ്ങള്‍ക്കു ശേഷമാണ് അമേരിക്ക ഈ പ്രമേയം അവതരിപ്പിച്ചത്. ഒരു ദിവസം മുഴുവന്‍ നീണ്ടു നിന്ന ചര്‍ച്ചകള്‍ക്കു ശേഷം പ്രമേയം സപ്തംബര്‍ 28 വെള്ളിയാഴ്ച 15 അംഗ സുരക്ഷാ കൗണ്‍സില്‍ ഏകകണ്ഠമായി അംഗീകരിക്കുകയായിരുന്നു. എന്നാല്‍ പ്രമേയം നടപ്പാക്കാത്ത രാജ്യങ്ങള്‍ക്കെതിരെ ഉപരോധം ഏര്‍പ്പെടുത്തണമെന്ന ആവശ്യം കൗണ്‍സില്‍ തല്‍ക്കാലം നിരാകരിച്ചു. പകരം എല്ലാ അംഗരാഷ്ട്രങ്ങളിലും പ്രമേയം നടപ്പാക്കുന്നതിനാവശ്യമായ നടപടികള്‍ എടുക്കാനാണ് കൗണ്‍സില്‍ നിര്‍ദ്ദേശിച്ചിരിക്കുന്നത്.

തീവ്രവാദ വിരുദ്ധ പ്രമേയം സുരക്ഷാ കൗണ്‍സില്‍ അംഗീകരിച്ചതോടെ അഫ്ഗാനിസ്ഥാനെതിരായ ആക്രമണത്തിന് അമേരിക്കക്ക് കൂടുതല്‍ പിന്തുണ ലഭിച്ചിരിക്കുകയാണ്. അമേരിക്ക കുറ്റവാളിയായി പ്രഖ്യാപിച്ച സൗദി ഇസ്ലാമിക തീവ്രവാദി ഒസാമ ബിന്‍ ലാദന് സംരക്ഷണം നല്‍കുന്ന അഫ്ഗാനിസ്ഥാനെതിരെ ആക്രമണമുണ്ടായാല്‍ അത് ഐക്യരാഷ്ട്ര സഭാ പ്രമേയത്തിന്റെ അടിസ്ഥാനത്തിലാണെന്ന് ഇനി അമേരിക്കക്ക് ചൂണ്ടിക്കാണിക്കാനാകും.

എന്നാല്‍ പ്രമേയത്തില്‍ തീവ്രവാദത്തെ നിര്‍വചിച്ചിട്ടില്ലാത്തത് ചില അവ്യക്തതകള്‍ക്ക് വഴിവെച്ചേക്കും എന്ന് കരുതുന്നു. തീവ്രവാദത്തെയും സ്വാതന്ത്യ്രസമരത്തെയും വേര്‍തിരിച്ചു നിര്‍വചിക്കാന്‍ ചില അംഗരാഷ്ട്രങ്ങള്‍ ആവശ്യപ്പെട്ടിരുന്നു. നിര്‍വചനത്തിന്റെ കാര്യം 189 അംഗ ജനറല്‍ അസംബ്ലി ചര്‍ച്ച ചെയ്യും. എന്നാല്‍ അംഗരാഷ്ട്രങ്ങള്‍ക്ക് ഇക്കാര്യത്തില്‍ സമവായത്തിലെത്താന്‍ സാധിക്കുമോ എന്ന കാര്യം സംശയമാണ്.