കുടിലുകള്‍ പൊളിക്കണമെന്ന് സര്‍ക്കാര്‍, പറ്റില്ലെന്ന് കോര്‍പ്പറേഷന്‍

തിരുവനന്തപുരം: സെക്രട്ടറിയേറ്റിനും മുഖ്യമന്ത്രിയുടെ ഔദ്യോഗിക വസതിക്കും സമീപം കെട്ടിയ ആദിവാസി കുടിലുകള്‍ പൊളിച്ചുമാറ്റാന്‍ സംസ്ഥാന സര്‍ക്കാര്‍ തിരുവനന്തപുരം കോര്‍പ്പറേഷന് നിര്‍ദേശം നല്‍കി. അതേ സമയം കുടിലുകള്‍ പൊളിച്ചുമാറ്റാന്‍ ആവശ്യമായ സന്നാഹങ്ങങ്ങളൊന്നും കോര്‍പ്പേറഷനില്ലെന്നും അത് ചെയ്യേണ്ടത് പൊലീസാണെന്നും കോര്‍പ്പറേഷന്‍ മേയര്‍ ജെ.ചന്ദ്ര പറഞ്ഞു.

നഗരവികസന വകുപ്പ് ഒക്ടോബര്‍ അഞ്ച് വെള്ളിയാഴ്ചയാണ് ഇതുംസംബന്ധിച്ച നിര്‍ദേശം കോര്‍പ്പറേഷന് നല്‍കിയത്. നഗരവികസന സെക്രട്ടറി മേയര്‍ ജെ.ചന്ദ്രയ്ക്ക് നല്‍കിയ ഉത്തരവില്‍ ഇത്തരം കുടില്‍ നിര്‍മാണങ്ങള്‍ ഭാവിയിലുണ്ടാവില്ലെന്ന് ഉറപ്പുവരുത്തണമെന്നും നിര്‍ദേശിച്ചു.

അതേ സമയം ക്രമസമാധാന പ്രശ്നം പരിഹരിക്കേണ്ടത് പൊലീസാണെന്ന നിലപാടിലാണ് കോര്‍പ്പറേഷന്‍. ആവശ്യമായ വാഹനങ്ങളും മറ്റും നല്‍കി പൊലീസിനെ സഹായിക്കാന്‍ മാത്രമേ കോര്‍പ്പറേഷന് കഴിയൂവെന്ന് മേയര്‍ ചന്ദ്ര പറഞ്ഞു. കോര്‍പ്പറേഷന്‍ ജീവനക്കാര്‍ക്ക് ഇത്തരം സമരപരിപാടികള്‍ കൈകാര്യം ചെയ്യാനാവില്ല. ഇത്തരം കാര്യങ്ങള്‍ പൊലീസാണ് മുന്‍കാലങ്ങളില്‍ ചെയ്തിരുന്നതെന്നും കോര്‍പ്പറേഷന്‍ അതിലൊന്നും ഇടപെടാറില്ലെന്നും ചന്ദ്ര പറഞ്ഞു.

കോര്‍പ്പറേഷനെ ഈ പ്രശ്നത്തില്‍ കുരുക്കാനുള്ള തന്ത്രമാണ് സര്‍ക്കാര്‍ ഉത്തരവിന് പിന്നിലുള്ളത്. നഗരവികസന വകുപ്പ് സെക്രട്ടറിയുടെ മുന്നില്‍ താന്‍ പ്രശ്നം അവതരിപ്പിക്കുമെന്നും മേയര്‍ പറഞ്ഞു.