പ്രകാശാനന്ദയുടെ ഹര്‍ജി തള്ളി; ശിവഗിരി തിരഞ്ഞെടുപ്പ് 11ന്

തിരുവനന്തപുരം: ശിവഗിരി ശ്രീനാരായണ ധര്‍മസംഘം ട്രസ്റിലേക്കുള്ള തിരഞ്ഞെടുപ്പ് മാറ്റിവെക്കണമെന്ന് ആവശ്യപ്പെട്ട് പ്രകാശാനന്ദ നല്‍കിയ ഹര്‍ജി സുപ്രിം കോടതി തള്ളിയതോടെ തിരഞ്ഞെടുപ്പ് ഒക്ടോബര്‍ 11ന് തന്നെ നടക്കുമെന്ന് ഉറപ്പായി.

ഹൈക്കോടതി നിര്‍ദേശ പ്രകാരം ഉപദേശക സമിതി തയ്യാറാക്കിയ ലിസ്റില്‍ യോഗ്യരായ പലരെയും ഉള്‍പ്പെടുത്തിയിട്ടില്ലെന്ന് ചൂണ്ടിക്കാണിച്ചാണ് പ്രകാശാനന്ദ ഹര്‍ജി നല്‍കിയത്. പുതിയ ലിസ്റ് തയ്യാറാക്കണമെന്നും അതുവരെ തിരഞ്ഞെടുപ്പ് നീട്ടിവെക്കണമെന്നുമുള്ള വാദം സുപ്രിം കോടതി തള്ളി.

ലിസ്റിലുള്ള 41 പേര്‍ ട്രസ്റിന്റെ ബോര്‍ഡിലെ അംഗങ്ങളായി 11 പേരെയാണ് തിരഞ്ഞെടുക്കേണ്ടത്. ഈ അംഗങ്ങള്‍ ബോര്‍ഡ് ഭാരവാഹികളെ തിരഞ്ഞെടുക്കും.

നാമനിര്‍ദേശ പത്രിക സമര്‍പ്പിക്കാനുള്ള അവസാന തീയതി ഒക്ടോബര്‍ അഞ്ച് വെള്ളിയാഴ്ചയായിരുന്നു. സ്വാമി ശാശ്വതികാനന്ദയുടെ വിഭാഗം 11 സീറ്റിലേക്കും പത്രിക നല്‍കിട്ടുണ്ട്. അതേ സമയം സ്വാമി പ്രകാശാന്ദ വിഭാഗം ഏഴ് സീറ്റിലേക്ക് മാത്രമേ പത്രിക നല്‍കിയുള്ളൂ. ശാശ്വതികാനന്ദയും പ്രകാശാനന്ദയും തിരഞ്ഞെടുപ്പില്‍ മത്സരിക്കുന്നില്ല. പത്രികകള്‍ ശനിയാഴ്ചയാണ് പരിശോധിക്കുന്നത്.