ആയുര്‍വേദത്തിന് സുമോ ഗുസ്തിയിലൂടെ പ്രചാരം

തിരുവനന്തപുരം: സുമോ ഗുസ്തിക്കാരെ കുറിച്ച് ഒരു ജപ്പാന്‍ കമ്പനി തയാറാക്കിയ ഡോക്യുമെന്ററിയില്‍ കോവളവും കേരളത്തിന്റെ സ്വന്തം ആയുര്‍വേദവും.

സുമോ ഗുസ്തിക്കാരായ കൊനിഷികി യസോകിചിയെയും ഹതാ ക്യോ കുദോജനെയും കുറിച്ചുള്ള ഡോക്യുമെന്ററിയിലാണ് കോവളവും ആയുര്‍വേദ ചികിത്സയും പ്രത്യക്ഷപ്പെടുന്നത്. കോവളത്തെ അശോകാ ഹോട്ടലില്‍ നാല് ദിവസത്തെ ആയുര്‍വേദ സുഖചികിത്സ ആസ്വദിക്കുന്ന കൊനിഷികിയാണ് ജപ്പാനിലെ നിപ്പോണ്‍ ടെലിവിഷന്‍ ഒരുക്കിയ ലഘുചിത്രത്തില്‍ നിറഞ്ഞുനില്‍ക്കുന്നത്.

വിദഗ്ധരായ ആയുര്‍വേദ ഡോക്ടര്‍മാര്‍ കൊനിഷികിയെ പരിശോധിക്കുന്നതാണ് ഡോക്യുമെന്ററിയുടെ തുടക്കത്തില്‍. സുമോ ഗുസ്തിയില്‍ നിന്നും വിരമിച്ചതിനാല്‍ ദുര്‍മേദസും രക്തസമ്മര്‍ദവും കുറയ്ക്കാനാണ് ആയുര്‍വേദ ചികിത്സയിലൂടെ കൊനിഷികിയുടെ ശ്രമം. ഏലാദി കേരതൈലം ഉപയോഗിച്ച് കൊനിഷിക്ക് ശിരോധാര നടത്തുന്നതും തേക്കിന്‍ തടിയില്‍ തീര്‍ത്ത വലിയ കട്ടിലില്‍ കമിഴ്ന്നുകിടക്കുന്ന കൊനിഷികിയുടെ ശരീരത്തില്‍ ചവിട്ടിത്തിരുമ്മുന്ന തിരുമ്മല്‍കാരെയും ഡോക്യുമെന്ററിയില്‍ ഒപ്പിയെടുത്തിരിക്കുന്നു.

രണ്ട് ഗുസ്തിക്കാരും ആവിക്കുളി നടത്തുന്നതും പിന്നെ സമുദ്രസ്നാനം നടത്തുന്നതും ഡോക്യുമെന്ററിയില്‍ ചിത്രീകരിച്ചിട്ടുണ്ട്. ഓലനും കാളനും ചീരത്തോരനും തയാറാക്കുന്നതെങ്ങനെയെന്നും ഈ ലഘുചിത്രത്തില്‍ കാണിക്കുന്നുണ്ട്. കേരളത്തിലെ കളരിപ്പയറ്റ് സംഘങ്ങളുമായി ഇവര്‍ ചര്‍ച്ച നടത്തുന്നതും സുമോ കളരിപ്പയറ്റ് കലകളുടെ സംയുക്ത പ്രകടനവുമെല്ലാം ഡോക്യുമെന്ററിയില്‍ ഉള്‍പ്പെടുത്തിയിട്ടുണ്ട്. ജപ്പാനിലെ ടെലിവിഷന്‍ ചാനലുകളിലൂടെ സംപ്രേഷണം ചെയ്തുതുടങ്ങിയ ഡോക്യുമെന്ററി ഏറെ പ്രേക്ഷകരെ ആകര്‍ഷിക്കുന്നുണ്ടെന്ന് വിനോദസഞ്ചാര വകുപ്പ് വൃത്തങ്ങള്‍ അറിയിച്ചു. ഇതിന്റെ പേരില്‍ ജപ്പാനില്‍ നിന്നും വളരെയധികം വിനോദസഞ്ചാരികള്‍ എത്തുമെന്ന പ്രതീക്ഷയിലാണ് വകുപ്പ്.